Tweede verdagte vas weens Wasserfall-moord

Denver Kisting – Weke nadat die 28-jarige me. Azaan Madisia weens die grumoord op me. Shannon Wasserfall op Walvisbaai aangekeer is, is ’n man (22) Donderdag ook in hegtenis geneem.
Adj.komm. Kauna Shikwambi, die nasionale polisiewoordvoerder, het dié verwikkeling Vrydagoggend in ’n e-pos aan die media bevestig.
Volgens haar is die jongste verdagte ’n familielid van Madisia.
Die man het hom na wat verneem word Donderdagaand gaan oorgee by die Narraville-polisiekantoor.
Hy het glo gebieg dat Madisia hom na bewering gevra het om te help om van Wasserfall se oorskot ontslae te word, sê Shikwambi.
Die man sal Maandag in die Walvisbaai-landdroshof op aanklag van moord en regsverydeling verskyn.
Wasserfall word volgende naweek op die hawedorp begrawe.
Haar oorskot is onlangs in die duine by Narraville gevind nadat sy reeds sedert April vanjaar vermis was.
[email protected]