Tweede ronde lewer geen verrassings nie
Rugby
Tielman van Lill
In die Premierliga van die Namibiese Rugbyunie (NRU) het ses klubs Saterdag koppe gestamp. In Windhoek oorheers Trustco United 1 vir FNB Western Suburbs 1 met 18 - 13, terwyl FNB Unam 1 op Rehoboth vir Reho Falcon 1 met 43 - 0 gestuit het.
By die kus was Kudus 1 met 47 - 17 te sterk vir die besoekende eerstespan van Rehoboth Rugbyklub.
Met net sewe Premierliga-klubs oor in Namibië kon Wanderers ‘n afnaweek geniet, terwyl die ander ses hul beset in die tweede ronde van dié liga moes lewer.
In ‘n klipharde, maar baie gelykop botsing by Suburbs-park in Khomasdal moes United hard werk om ‘n oorwinning te behaal. Heelwat nuwe gesigte is by die Bloues te bespeur en die samespel nog nie wat dit moet wees nie, maar dit het geen afbreuk aan die geesdrif van beide spanne gedoen nie.
Suburbs, wat verlede jaar in die Gold Cup-reeks in Suid-Afrika gaan ondervinding opdoen het, was met rustyd 11-3 agter, maar die voorsprong het eers opgeduik toe die gasheer ‘n blaps in die Bloues se halfgebied begaan het. Riaan van Zyl, nuwe aanwins vir United, wat Saterdag op heelagter diens verrig het, is weggestuur en het langs die linkerkantste kantlyn afgenael om sy span se eerste drie te druk sonder dat daar ‘n hand op hom gelê was.
Na rustyd slaan Suburbs hard terug toe Geno Wilson, sy buitesenter, die verdediging van die besoekers onkant betrap en hy met Riaan van Zyl op sy rug oor die doellyn val om Suburbs se enigste drie te druk en die telling saam met die suksesvolle doelskop van Justin Nel tot 11 – 10 laat krimp.
Keerpunt
Beide spanne lewer puik verdediging en hoewel heelwat strafskoppe afgestaan is, was die wedstryd skoon en aanskoulik. Dit was egter Nandivatu Karuuombe, spoedvraat op linkervleuel vir United, wat die laaste sê gehad het om sy span se tweede vyfpunter agter die doellyn te plant. Winmar Rust, slot en kaptein van United het Saterdag sy skopstewels by die huis vergeet, maar slaag met dié doelskop om die telling 18-10 te maak.
Vir Suburbs plaas Nel ‘n tweede strafskop oor die dwarslat om die eindtelling op 18-15 te bring. In die doodsnikke van die wedstryd behaal Van Zyl so byna ‘n tweede drie toe hy ‘n skoppie vorentoe gee. Sy spoed was egter hopeloos te veel vir die skeidsregter en sy twee assistente om te kan sien of hy die bal voor die doodlyn gedruk het en die drie word nie toegeken nie.
Shaun Kaizemie, hulpafrigter van Suburbs en oudlosskakel van die nasionale Welwitschias-span, het gesê hy is tevrede met die vordering wat sy span gemaak het.
“Ek is baie gelukkig met die wedstryd, want daar was heelwat vordering gemaak sedert ons verlede week teen FNB Unam gespeel het. Ons het baie tegniese foute gemaak. In die tweede helfte was ons vir meer as 30 minute op die aanval in hul halfgebied, maar kon weens foute nie punte aanteken nie. Daar is ‘n klomp nuwe jong ouens in die span, maar ons is gelukkig om die kern van die Gold Cup-span te kon behou.
“Die twee geelkaarte wat ons gekry het, het ons die wedstryd gekos, want ons moes bykans vir 10 minute met net 13 spelers speel. Met die kern van die Gold Cup-span tot ons beskikking moes ons egter die wedstryd gewen het. Op ‘n stadium is ses strafskoppe teen United in hul kwartgebied toegeken, maar geen geelkaarte is gewys nie. Ons is nou onder geweldige druk en ek het vir die ouens gesê hoe ek daaroor voel. Ons sal vandeesweek bitter hard moet werk om die foute aan te spreek. Ek voel egter dat ons beter teen Wanderers gaan vaar wat Saterdag vir ons wag,” het Kaizemi aan Republikein gesê.
Vir United druk Riaan van Zyl en Nadivatu Karuuombe elk ‘n drie, terwyl Winmar Rust ‘n doelskop en twee strafdoele behaal. Suburbs se puntemakers is Gino Wilson met sy drie en Justin Nel wat met twee strafskoppe en een doelskop sukses behaal.
Op Rehoboth
FNB Unam 1, Premierligakampioen van die afgelope drie jaar, het Saterdag op Rehoboth ‘n draai gaan maak om sy kragvertoning teen Reho Falcon 1 voort te sit. Maar so maklik het dit nie gegaan nie. Met halftyd was die besoekers met slegs 14-0 voor. Dit is eers ná die 60ste minuut wat Unam sy wurggreep op die botsing kon kry nadat ‘n handvol spelers van Falcon weens beserings vervang moes word.
Iss Gerald, afrigter van Falcons, het hoop vir sy jong span.
“Die telling is redelik vleiend vir Unam, want in die 60ste minuut was dit steeds 14-0. Nadat ons ‘n klomp spelers weens beserings verloor het, het die gebrek aan diepte na vore getree, wat die totale ritme van die span versteur het. Ek het eers my heelagter verloor, toe my buitesenter, en daarna is die skrum- sowel as die losskakel beseer. Die binnesenter moes later as skrumskakel ingespan word, dus was my verdediging in die middelveld nie na wense nie en Unam kry dit reg om nog ‘n klompie drieë in te ryg.
“Ons het regtig net tussen 15 en 17 kompeterende spelers wat in die Premierliga kan speel. Boonop is hulle tussen 18 en 21 jaar oud. Ek is seker daarvan dat ons met die nodige borge weer ‘n krag in rugby kan word. Ons tweedespan se gemiddelde ouderdom is 18 jaar en dit gee my baie hoop vir die toekoms,” het Gerald aan Republikein vertel.
Vir Unam het Freddy Puriza 2 en Camilo Martin, Chessborough Lawrence, Lorenso Louis, Mahepisa Tjeriko en Rodney Coetzee een elk gaan druk. Lorenso Louis het vier doelskoppe behaal.
Walvisbaai
Op Walvisbaai was Kudus 1 gereed vir die besoekers uit Rehoboth en het beide hul kragmetings gewen. Kudus 1 seëvier met 47 – 17. Vir Rehoboth druk Milando Titus, Paulus Hangula en Delano Coetzee terwyl Howard Titus ‘n doelskop behaal.
Geen inligting is van Kudus ontvang nie.
Reserweliga
Trustco United II 47 – 20 FNB Western Suburbs II. FNB Unam II 48 – 14 Reho Falcon II. Kudus II 32 – 0 Rehoboth Rugbyklub II.
In die Premierliga van die Namibiese Rugbyunie (NRU) het ses klubs Saterdag koppe gestamp. In Windhoek oorheers Trustco United 1 vir FNB Western Suburbs 1 met 18 - 13, terwyl FNB Unam 1 op Rehoboth vir Reho Falcon 1 met 43 - 0 gestuit het.
By die kus was Kudus 1 met 47 - 17 te sterk vir die besoekende eerstespan van Rehoboth Rugbyklub.
Met net sewe Premierliga-klubs oor in Namibië kon Wanderers ‘n afnaweek geniet, terwyl die ander ses hul beset in die tweede ronde van dié liga moes lewer.
In ‘n klipharde, maar baie gelykop botsing by Suburbs-park in Khomasdal moes United hard werk om ‘n oorwinning te behaal. Heelwat nuwe gesigte is by die Bloues te bespeur en die samespel nog nie wat dit moet wees nie, maar dit het geen afbreuk aan die geesdrif van beide spanne gedoen nie.
Suburbs, wat verlede jaar in die Gold Cup-reeks in Suid-Afrika gaan ondervinding opdoen het, was met rustyd 11-3 agter, maar die voorsprong het eers opgeduik toe die gasheer ‘n blaps in die Bloues se halfgebied begaan het. Riaan van Zyl, nuwe aanwins vir United, wat Saterdag op heelagter diens verrig het, is weggestuur en het langs die linkerkantste kantlyn afgenael om sy span se eerste drie te druk sonder dat daar ‘n hand op hom gelê was.
Na rustyd slaan Suburbs hard terug toe Geno Wilson, sy buitesenter, die verdediging van die besoekers onkant betrap en hy met Riaan van Zyl op sy rug oor die doellyn val om Suburbs se enigste drie te druk en die telling saam met die suksesvolle doelskop van Justin Nel tot 11 – 10 laat krimp.
Keerpunt
Beide spanne lewer puik verdediging en hoewel heelwat strafskoppe afgestaan is, was die wedstryd skoon en aanskoulik. Dit was egter Nandivatu Karuuombe, spoedvraat op linkervleuel vir United, wat die laaste sê gehad het om sy span se tweede vyfpunter agter die doellyn te plant. Winmar Rust, slot en kaptein van United het Saterdag sy skopstewels by die huis vergeet, maar slaag met dié doelskop om die telling 18-10 te maak.
Vir Suburbs plaas Nel ‘n tweede strafskop oor die dwarslat om die eindtelling op 18-15 te bring. In die doodsnikke van die wedstryd behaal Van Zyl so byna ‘n tweede drie toe hy ‘n skoppie vorentoe gee. Sy spoed was egter hopeloos te veel vir die skeidsregter en sy twee assistente om te kan sien of hy die bal voor die doodlyn gedruk het en die drie word nie toegeken nie.
Shaun Kaizemie, hulpafrigter van Suburbs en oudlosskakel van die nasionale Welwitschias-span, het gesê hy is tevrede met die vordering wat sy span gemaak het.
“Ek is baie gelukkig met die wedstryd, want daar was heelwat vordering gemaak sedert ons verlede week teen FNB Unam gespeel het. Ons het baie tegniese foute gemaak. In die tweede helfte was ons vir meer as 30 minute op die aanval in hul halfgebied, maar kon weens foute nie punte aanteken nie. Daar is ‘n klomp nuwe jong ouens in die span, maar ons is gelukkig om die kern van die Gold Cup-span te kon behou.
“Die twee geelkaarte wat ons gekry het, het ons die wedstryd gekos, want ons moes bykans vir 10 minute met net 13 spelers speel. Met die kern van die Gold Cup-span tot ons beskikking moes ons egter die wedstryd gewen het. Op ‘n stadium is ses strafskoppe teen United in hul kwartgebied toegeken, maar geen geelkaarte is gewys nie. Ons is nou onder geweldige druk en ek het vir die ouens gesê hoe ek daaroor voel. Ons sal vandeesweek bitter hard moet werk om die foute aan te spreek. Ek voel egter dat ons beter teen Wanderers gaan vaar wat Saterdag vir ons wag,” het Kaizemi aan Republikein gesê.
Vir United druk Riaan van Zyl en Nadivatu Karuuombe elk ‘n drie, terwyl Winmar Rust ‘n doelskop en twee strafdoele behaal. Suburbs se puntemakers is Gino Wilson met sy drie en Justin Nel wat met twee strafskoppe en een doelskop sukses behaal.
Op Rehoboth
FNB Unam 1, Premierligakampioen van die afgelope drie jaar, het Saterdag op Rehoboth ‘n draai gaan maak om sy kragvertoning teen Reho Falcon 1 voort te sit. Maar so maklik het dit nie gegaan nie. Met halftyd was die besoekers met slegs 14-0 voor. Dit is eers ná die 60ste minuut wat Unam sy wurggreep op die botsing kon kry nadat ‘n handvol spelers van Falcon weens beserings vervang moes word.
Iss Gerald, afrigter van Falcons, het hoop vir sy jong span.
“Die telling is redelik vleiend vir Unam, want in die 60ste minuut was dit steeds 14-0. Nadat ons ‘n klomp spelers weens beserings verloor het, het die gebrek aan diepte na vore getree, wat die totale ritme van die span versteur het. Ek het eers my heelagter verloor, toe my buitesenter, en daarna is die skrum- sowel as die losskakel beseer. Die binnesenter moes later as skrumskakel ingespan word, dus was my verdediging in die middelveld nie na wense nie en Unam kry dit reg om nog ‘n klompie drieë in te ryg.
“Ons het regtig net tussen 15 en 17 kompeterende spelers wat in die Premierliga kan speel. Boonop is hulle tussen 18 en 21 jaar oud. Ek is seker daarvan dat ons met die nodige borge weer ‘n krag in rugby kan word. Ons tweedespan se gemiddelde ouderdom is 18 jaar en dit gee my baie hoop vir die toekoms,” het Gerald aan Republikein vertel.
Vir Unam het Freddy Puriza 2 en Camilo Martin, Chessborough Lawrence, Lorenso Louis, Mahepisa Tjeriko en Rodney Coetzee een elk gaan druk. Lorenso Louis het vier doelskoppe behaal.
Walvisbaai
Op Walvisbaai was Kudus 1 gereed vir die besoekers uit Rehoboth en het beide hul kragmetings gewen. Kudus 1 seëvier met 47 – 17. Vir Rehoboth druk Milando Titus, Paulus Hangula en Delano Coetzee terwyl Howard Titus ‘n doelskop behaal.
Geen inligting is van Kudus ontvang nie.
Reserweliga
Trustco United II 47 – 20 FNB Western Suburbs II. FNB Unam II 48 – 14 Reho Falcon II. Kudus II 32 – 0 Rehoboth Rugbyklub II.
Kommentaar
Republikein
Geen kommentaar is op hierdie artikel gelaat nie