Twee weke oue baba sterf tuis aan Covid

Die minister van gesondheid en maatskaplike dienste, dr. Kalumbi Shangula, het bekend gemaak 'n twee weke oue babameisie is op 27 Desember op Keetmanshoop aan Covid-19 dood. Sy het tuis gesterf.
Dit bring die totale getal sterftes sedert die begin van die pandemie op 3 340 te staan. 'n Verdere 316 mense is in dié tyd aan Covid-verwante oorsake dood.
Volgens Shangula het 263 mense uit 1 475 in die jongste verslagperiode positief getoets vir dié virussiekte, wat beteken die positiwiteitskoers is 17,8%. Onder diegene wat positief getoets het, het 16 mense vantevore ook Covid-19 gehad.
Intussen het die getal mense wat volledig ingeënt is, tot 344 010 toegeneem. Dit is 22,9% van die teikenbevolking.