Twee nuwe museums vir Namibië

Mariselle Stofberg - Twee nuwe museums en twee mobiele uitstallings gaan met die nuwe projek van die Museumsvereniging van Namibië (MAN) van stapel gestuur word. Die projek, getiteld “Museumontwikkeling as 'n middel tot die versterking van kulturele regte in Namibië”, het Maandag amptelik in Windhoek afgeskop. Dit sal vier komponente hê. Die eerste is die oprigting van die Museum van Namibiese Musiek, met slypskole wat vir volgende jaar Februarie beplan word om die belangegroepe by te staan met die beplanning van die museum. Die gemeenskap word uitgenooi om enige instrumente, foto's, stories en opnames te stuur wat hul dink deel van die museum kan wees, om die kulturele identiteit van die land te verteenwoordig. Die tweede deel van die projek is die oprigting van 'n permanente en funksionele museum op Katima Mulilo met die fokus op die skakel tussen die omgewingshulpbronne van die streek en die kulturele regte van die plaaslike gemeenskappe. “Die waarde van die Kavango-Zambezi-oorgrensbewaringsgebied bekend as Kaza word dikwels onderskat. Ons hoop om met hierdie projek die natuurlewe, kulture en ryk geskiedenis van hierdie besonderse gebied te verenig in een museum,” sê me. Jana Hybaskova, die Europese Unie (EU) se ambassadeur in NamibiëTwee mobiele uitstallings sal ook bekend gestel word. Die eerste uitstalling sal in samewerking met die Nakambale Museum op Olukonda bestuur word. Hierdie museum fokus veral op die geskiedenis van die Finse sendelinge in Namibië, maar bevat ook geskiedkundige artefakte van die Owambo-kultuur. SAN-GESKIEDENISDie ander uitstalling gaan fokus op die geskiedenis en kultuur van die San-gemeenskappe. “Ek het al eerstehands ervaar hoe San-kinders te bang is om hul moedertaal te praat omdat hulle dikwels gespot word. Met hierdie projek kan ons hierdie unieke kultuur van die San in sy wese vasvang en beskerm vir toekomstige geslagte, terwyl ons 'n omgewing skep waar die San-gemeenskap trots kan wees op hul erfenis en kultuur,” sê Hybaskova.Die projek het ten doel om die aantal museums in die land te vermeerder en om eindelik museums meer dinamies, mobiel en kultureel-geörienteerd te maak. Die EU het ingestem om ongeveer N$3,7 miljoen vir die tydperk van twee jaar aan MAN te gee en sodoende streeksmuseumontwikkeling te ondersteun. “Hierdie projek gaan dit moontlik maak om die kulturele regte van elke man en vrou in Namibië te beskerm. Dit maak uiteindelik die vereniging van die diverse kulturele regte van Namibië moontlik,” sê Hybaskova. Die ministerie van onderwys, kuns en kultuur dek die kernbedryfskostes van MAN elke jaar. “Deur hierdie projek is dit moontlik om die rassisme en die onderlinge diskriminasie van stamme uit te daag en mense in te lig,” sê me. Esther Moombolah-Goagoses, direkteur van die nasionale erfenis- en kultuurprogram.Dr. Jeremy Silvester, direkteur van MAN, sê: “MAN het 'n droom. Ons droom van museums in Namibië wat ruimtes van ontmoeting sal wees waar dansers, sangers, musikante, kurators en kunstenaars mekaar kan ontmoet.”Silvester beklemtoon die belangrikheid van die gemeenskap se ondersteuning en inkoop in die projek.

Twee nuwe museums vir Namibië

Kommentaar

Republikein 2025-12-23

Meld asseblief aan om kommentaar te lewer

Twee nuwe museums vir Namibië

Kommentaar

Republikein 2025-12-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.