Twee ego’s: 'n Magtige dreuning

Erika Gibson - Die Chinese leier, Xi Jinping, het Saterdag pres. Donald Trump van Amerika gebel en gevra om op te hou met retoriek wat die hele wêreld in ’n oorlog kan dompel. Dit volg nadat dié weer losgetrek het en gesê het Noord-Korea gaan “regtig spyt wees” as hy ’n geveg met Amerika begin. Die bekgeveg tussen die twee grootste los kanonne in die krisis – Kim Jong-oen van Noord-Korea en Trump – is die onvoorspelbaarste wapen in dié konflik.Trump baklei voort op sosiale media en Kim baklei terug deur te sê Amerika gaan boet vir die verskerpte sanksies teen sy land en Trump se roekelose militêre uitlokking. Vrydagoggend het Trump foto’s van die Amerikaanse gevegspos in die Stille Oseaan getwiet waar twee Amerikaanse B-1B-bomwerpers by hul eweknieë in Suid-Korea en Japan aangesluit het.Die Amerikaners hou reeds jare bomwerpers op die eiland Guam, wat die waarskynlikste teiken vir Kim se dreigende missielaanvalle kan wees.Trump het in sy boodskappe verwys na #FightTonight. In die verlede het die Pentagon en die Amerikaanse magte die leuse "fight tonight" nog altyd gebruik as ’n aanduiding dat hulle gereed is om tot ’n geveg oor te gaan.Angela Merkel, Duitse bondskanselier, sê sy glo nie die huidige krisis se oplossing lê in militêre optrede nie, waarop Trump laat waai het dat sy asseblief namens Duitsland moet praat en nie namens Amerika nie.Sergei Lawrof, Rusland se minister van buitelandse sake, het gemaan die kans vir direkte konflik te midde al die oor-en-weer-retoriek is bitter hoog.Amerika se bondgenote in die Stille Oseaan – Japan, Suid-Korea en Australië – het gevra vir kalmte, maar terselfdertyd hul steun aan die VSA belowe.Noord-Korea het in Mei en Julie twee keer toetse regop die lug in gedoen met sy hoogs gevorderde Hwasong-12- en -14-modelmissiel. Op 28 Julie het hy ’n hoogte van nagenoeg 3 700 km daarmee bereik.Die trajek daarvan, as dit horisontaal gemeet sou word, sou Guam, sowat 3 200 km ver, met gemak kon tref. Horisontaal sou die missiel se reikafstand egter volgens kenners selfs tot by Los Angeles en Chicago kon strek.Volgens Helmoed-Römer Heitman, militêre ontleder, is die groot vraag egter of Noord-Korea ’n gepaste plofkop vir die missiel kon ontwerp. Amerika glo dit het. Die ander vraag is of daar ’n komponent vir die missiel ontwerp is om dit van buite die aarde se atmosfeer terug te bring op pad na ’n teiken toe sonder dat die missiel eenvoudig disintegreer.“Dié wapen hou vir Amerika die bedreiging in dat dit stede in die VSA kan platvee.“Die probleem is dat Kim nie net ’n diktator is wat ten alle koste aan bewind wil bly nie, maar dat hy irrasioneel is. Die vrees is dus dat hy in ’n woedebui as hy vermoed sy bewind is werklik in gevaar, kan meen hy het niks om te verloor as hy met ’n missielaanval laat waai nie.“Hy kan selfs ’n kop op die Hwasong-14 laat sit waarvan die elektromagnetiese pulse genoeg sal wees om elektroniese transistors oor ’n groot gebied in Amerika buite werking te laat.“Dit sal motors, rekenaars, radio’s en telefoon- en kragnetwerke buite werking laat, wat chaos kan veroorsaak.”Volgens prof. Renfrew Christie, missiel- en kernkenner van die Universiteit van Kaapstad, hou China tans waarskynlik die beste troefkaart om die situasie tussen Kim en Trump te ontlont.China en Noord-Korea is geswore bondgenote en China en Amerika is in komplekse ekonomiese onderhandelinge gewikkel.Die krisis in Noord-Korea is die troefkaart waarmee hulle nou speel, sê Christie.“China kan Noord-Korea binne ’n dag stilmaak, want 90% van Noord-Koreaanse handel is met China. Om swaarde met kernwapens te swaai is egter ’n fout wat in massasterftes kan eindig.”Heitman sê: “Die onvoorspelbare magsug van die twee leiers is die kern van die kwessie en is die faktor wat die rooi knoppies aan albei kante kan aktiveer.” - Netwerk24Bykomende bronne: The Washington Post; Reuters

Twee ego’s: 'n Magtige dreuning

Kommentaar

Republikein 2025-11-04

Meld asseblief aan om kommentaar te lewer

Twee ego’s: 'n Magtige dreuning

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.