Twee Chinese mans vas oor renosterhorings

Augetto Graig - Twee Chinese mans is Donderdagaand in Windhoek tydens 'n polisieklopjag met twee renosterhorings in hul besit betrap.

Volgens 'n woordvoerder van die Namibiese polisie, hoofinsp. Kauna Shikwambi, is die Chinese omstreeks 22:00 met twee renosterhorings en 'n haelgeweer in hul besit by die Berghof-woonstelblok in die Eros-woonbuurt in hegtenis geneem.

“Die huis was onder polisiewaarneming ná 'n intelligensie-gedrewe ondersoek en die horings en vuurwapen is tydens 'n klopjag gevind. Dit was 'n gesamentlike operasie tussen die Namibiese polisie en die Windhoekse stadspolisie,” het Shikwambi gister by die polisie se weeklikse misdaadnuuskonferensie gesê.

Sy kon nie bevestig of die horings van die witrenosters afkomstig is wat knap voor Kersfees op 'n plaas naby Gobabis gestroop is nie, soos op sosiale media bespiegel word.

“Die waarde van die renosterhorings is ook nog nie vasgestel nie,” het Shikwambi gesê.

Die twee Chinese verskyn vandag in die landdroshof in Windhoek.

Intussen het nog 'n Chinees, Ye Zhiwei (28), wat op 23 November met 18 renosterhorings deur die Internasionale Lughawe Hosea Kutako geglip en op die Internasionale Lughawe O.R. Tambo betrap is, verlede Dinsdag in Kempton Park se landdroshof skuldig gepleit.

Ye het skuldig gepleit op die oortreding van die Wet op Nasionale Omgewingsbestuur wat bedreigde spesies reguleer.

Ye verskyn op 10 Februarie in die hof vir vonnisoplegging.

Sersant Pendapala Iitula (42) van lugvaartsekuriteit by die Internasionale Lughawe Hosea Kutako het weer in die Katutura-landdroshof verskyn omdat hy na bewering vir Ye met die 18 renosterhorings by die skandeerders op die lughawe laat deurglip het. Iitula het glo tydens die voorval by die skandeerders gewerk.

Hy verskyn op klagte van regsverydeling en dwarsboming van die gereg en is op borgtog van N$2 000 vrygelaat.

Iitula se saak is tot 3 Februarie uitgestel.