Twee bly agter tralies ná Aussenkehr-moord

'n Man en vrou het Dinsdag in die Karasburg-landdroshof verskyn in verband met die moord op 'n 32-jarige vrou, me. Patricia Madyumo, wie se halfnaakte liggaam op 6 Oktober in Aussenkehr gevind is.

Die beskuldigdes, mnr. Peter Nambahu (34) en me. Katiku Muronga (24), staan tereg op klagte van moord, roof met verswarende omstandighede en die verminking van 'n lyk. Nambahu staar 'n bykomende klag van verkragting in die gesig.

Landdros Salome Bampton het die saak tot 9 November vir verdere ondersoek uitgestel, asook vir die beskuldigdes om regshulp te bekom.

Nambahu en Muronga word daarvan beskuldig dat hulle op die nag van 5 Oktober vir Madyumo in Blok 5 op Aussenkehr in die ||Kharasstreek vermoor het. Haar halfnaakte liggaam is die volgende oggend vroeg op 'n druiweplaas gevind.

Die beskuldigdes is borgtog geweier omdat die polisieondersoek nog in 'n vroeë stadium is en hulle moontlik met die staatsgetuies kan inmeng. Hulle bly in aanhouding in die polisie se aanhoudingselle op Karasburg.

Staatsaanklaer Yeukai Kangira het vir die staat verskyn.

- Nampa