Twakkie, my boesemvriend

DIRK VAN ZYL SKRYF:Is twakkie my boesemvriend? Kyk wat hy alles vir en aan my doen. Wie is die blinde?Die tabak vat my geld, dit laat my stink, my huis stink, en die vrot reukie klou aan my soos ’n verliefde. Hy verstop my are, my bloed word dik en hy gee my kanker. Ek weet dit, want ek sien wat met sy ander vriende gebeur. Hy verouder my gelaat en bring my in opstand as ek sonder hom is. Hy maak my ’n verslaafde, ek word ’n leuenaar, want ek wil nie erken ek is die slaaf van ’n plant nie.Ek lieg vir die dokter as hy wil weet hoeveel ek rook. So lieg ek op my aansoekvorm vir werk. Ek lieg vir my kerkleier, ek lieg as hulle my vra oor my kroniese hoesie. Ek vertel hulle dat ek ’n skoon roker is — wat dit ook mag wees. Dit maak my vrekkig en wil nie my rookgoed met ander deel nie. Ek gebruik tot my kinders se sakgeld, of ek vat van my tiende om tabak te koop.Ek mishandel my kinders deur in die huis te rook. Hulle oë brand, die longe brand, hulle hoes en sê dat hulle nie asem kry nie, maar ek pak die skuld op iets anders en sê hulle het asma. Arme asma word darem baie vals beskuldig.Die tabak vat so baie van my geld dat my kinders soms honger moet gaan slaap, want daar is nie geld vir ’n brood nie. Twakkie maak van my ’n morsjors; dis leë sigaretdosies, papier, stompies op die vloer, in asbakke en toilette, gebruikte vuurhoutjies en as. Dan besoedel ek nog die lug ook.Ek word ’n skelm, ek rook skelm, en probeer selfs om vir God weg te kruip. Kyk maar wat doen twakkie met my as daar mense kom wat nie rook nie, of my altyd daarop wys dat rook ongesond is en op die gevolge daarvan. Ek steek my rookgoed weg, sodat hulle dit nie sien nie, want dan sal daar weer gepreek word.As ek by ’n plek is waar twakkie nie toegelaat word nie, dan smokkel ek dit in. Twakkie het nou van my ’n slaaf gemaak, as die tabak praat, dan spring ek.Dit maak my selfsugtig en ek gee nie om vir ander nie. Ek rook tussen hulle, oud of jonk. Hulle moet maar aanvaar en verdra, want twakkie is eerste in my lewe.Twakkie het al baie, gesiene rokers geld of sigarette laat bedel; skaamteloos, om net die vlak van die nikotien te herstel. Wanneer ek bestuur moet die passasiers dit maar ontgeld.Twakkie het al menige mense brandstigters gemaak.Die tabak maak my vingers geel, maar ek sê sommer ek het pampoen geskil. Die gerook skuif my uit, want waar ek kom, staan geskryf: “Rook verbode.” Ek moet maar buite bly.Rook het van my ’n swakkeling gemaak. Ek kan die rook net met woorde los, maar in dade sal dit nooit geskied nie.Twakkie maak van my ’n moordenaar. Ek is besig om ander mense te versmoor, en om myself om die lewe te bring.

Twakkie, my boesemvriend

Kommentaar

Republikein 2025-05-16

Meld asseblief aan om kommentaar te lewer

Twakkie, my boesemvriend

Kommentaar

Republikein 2025-05-16

Meld asseblief aan om kommentaar te lewer

MELD AAN

Advertensie