Twaalfjarige verdien só haar sakgeld

Tanja Bause –
“Met die geld wat ek deur die vleg van hare maak, koop ek vir myself klere. Ek gee ook van die geld vir my ma om haar te help,” vertel Reminda Haobes (12).

Haar ma, Welinda Haobes, het vir Reminda verlede jaar Desember geleer hoe om hare te vleg.

“Maria het gesien hoe ek my tannie se hare vleg en sy het my gevra of ek haar hare ook kan vleg. Ek het dit gedoen en nou vleg ek baie mense in die buurt se hare en verdien so my sakgeld.”

Aangesien sy skool toe gaan en in die namiddae ekstra klasse bywoon, kan sy slegs oor naweke mense se hare vleg.

Volgens Reminda is dit baie bevredigend wanneer sy klaar is en die algehele prentjie kan sien. Hoe mooi die meisies se hare lyk en hoe baie hulle van haar handewerk hou.

“Ek dink meisies van my ouderdom moet nou al iets kry om hulself besig te hou. Al is dit iets kleins, solank hulle iets doen en uit die strate bly.”

“Ek is baie trots op my dogter, want dit is iets wat sy van my geleer het. Dit laat my goed voel,” het haar ma gesê.

Reminda wil ná skool ’n verpleegster word.

“Ek wil help om mense gesond te maak en ek wil hulle versorg,” het sy gesê. - [email protected]