Tsumeb lok sterkes en fikses

Die Tsumeb Health & Fitness Centre is môre tussen 12:00 en 21:00 die plek vir die noordedorp se Crossfit-kampioenskap. In die aanloop hiertoe, vanaf 09:00, word egter ’n kragkompetisie vir mans en vroue aangebied, met krulle (curls) as die enigste kragtoets. Pryse ter waarde van N$5 000 is op die spel wat tydens die medaljeseremonie uitgedeel sal word. Die inskrywingsgeld beloop N$100 per deelnemer. Geen onderskeid vir kategorieë word getref nie, want die wenners word bepaal op grond van die verhouding tussen liggaamsmassa en die gewig wat opgetel word. Belangstellende deelnemers kan by die organiseerders aanmeld (081 695 1214 of 081 283 1679) om die kompetisiereëls te bekom. Op die foto is mnr. Marius Johannes van Tsumeb, organiseerder en bekende Namibiese kragopteller.