Tsumeb-gemeenskap ruk op oor polisiebaas
Lede van die Tsumeb-gemeenskap sê hulle is nie tevrede met die manier waarop 'n moordsaak teen die dorp se stasiebevelvoerder hanteer word nie.
Catherine Sasman
Inwoners van Tsumeb het 'n emosionele betoging voor die polisiekantoor op die dorp gehou om te eis dat hoofinsp. Bernhard Nghuulivali 'n regverdige verhoor kry.
Nguulivali is van moord aangekla omdat hy die 17-jarige Hendrik Eiseb in Februarie vanjaar na bewering doodgeskiet het.
Hy is dié dorp se stasiebevelvoerder.
Nghuulivali, wat tans op borgtog van N$10 000 uit is, het teruggekeer werk toe en werk steeds met dieselfde gemeenskap in Uitbreiding 6, 'n informele nedersetting op die dorp, waar Eiseb, 'n San-tiener, vandaan gekom het.
Hy moet weer môre in die hof verskyn.
Volgens 'n klagskrif wat inwoners gister aan die polisie oorhandig het, is hulle “geskok” oor die manier waarop die hof Nghuulivali se saak behartig het.
Die klagskrif voer aan daar was op die dag van Eiseb se moord 'n toesmeerdery en dat “onnodige vertragings” tot Nghuulivali se inhegtenisname gelei het.
Inwoners eis dat ander speurders as dié wat tot dusver die ondersoek behartig het, die saak moet hanteer.
Volgens die petisie is die vuurwapen waarmee Eiseb geskiet is, nooit gevind nie.
Die gemeenskap eis ook dat 'n staatsaanklaer van buite Tsumeb namens die staat moet optree.
Hulle sê hulle sal weer met hul plakkate voor die landdroshof gaan betoog op die dag wat die verhoor begin om die aandag op hul eise te vestig.
Nghuulivali het teruggekeer werk toe nadat hy op borgtog vrygelaat is en het selfs 'n openbare vergadering op 10 April toegespreek.
Dit het teenkanting van beide die Tsumeb-gemeenskap en binne polisiegeledere ontlok.
'gemeenskap leef in vrees'
Nghuulivali het op 28 Januarie vanjaar glo met sy Toyota-bakkie stilgehou waar Eiseb en twee vriende in die rigting van die veld geloop het.
Volgens me. Bertha Hangula, 'n familielid van Eiseb se twee vriende, het Nghuulivali na wat verneem word na die seuns gestap, sy vuurwapen uitgehaal en Eiseb vir geen rede in die kop geskiet.
Die ander twee seuns het weggehardloop.
“Die hele gemeenskap leef in vrees omdat die verdagte nie geskors is nie,” lui die klagskrif.
'n Polisiebeampte wat verkies om anoniem te bly, sê Nghuulivali moes “volgens wet” deur die polisie geskors gewees het toe hy in hegtenis geneem is en dat hy in aanhouding moes bly totdat hy op borgtog vrygelaat is.
Die beampte sê die erns van die klag teen Nghuulivali regverdig skorsing sonder die toestemming van die raad op skorsings.
Alternatiewelik moes Nghuulivali sewe dae kennis gekry het om voor die raad te verskyn, het hy bygevoeg.
Nghuulivali is op 16 Maart in hegtenis geneem.
Volgens artikel 23 van die polisiewet kan die inspekteur-generaal van die polisie enige lid van die polisie hangende 'n strafregtelike verhoor skors. Alternatiewelik moet 'n ondersoek na die bevoegdheid van die betrokke polisiebeampte gedoen word óf dissiplinêre stappe moet teen die beampte gedoen word.
Die wet bepaal ook dat die inspekteur-generaal 'n polisiebeampte moet skors vir enige tydperk wat hy of sy in aanhouding is of 'n vonnis uitdien.
Adj.komm. Edwin Kanguatjivi, polisiewoordvoerder, het gister gesê 'n arbiter is verlede Donderdag aangestel om 'n dissiplinêre ondersoek teen Nghuulivali te doen, maar dat 'n nuwe arbiter intussen aangestel sal word. Kanguatjivi sê Nghuulivali sal sewe dae kennis kry sodra 'n nuwe arbiter aangestel is.
“Die proses is aan die gang. Ons kan nie 'n saak aframmel nie. Die ondersoek duur voort,” het Kanguatjivi gesê.
Inwoners van Tsumeb het 'n emosionele betoging voor die polisiekantoor op die dorp gehou om te eis dat hoofinsp. Bernhard Nghuulivali 'n regverdige verhoor kry.
Nguulivali is van moord aangekla omdat hy die 17-jarige Hendrik Eiseb in Februarie vanjaar na bewering doodgeskiet het.
Hy is dié dorp se stasiebevelvoerder.
Nghuulivali, wat tans op borgtog van N$10 000 uit is, het teruggekeer werk toe en werk steeds met dieselfde gemeenskap in Uitbreiding 6, 'n informele nedersetting op die dorp, waar Eiseb, 'n San-tiener, vandaan gekom het.
Hy moet weer môre in die hof verskyn.
Volgens 'n klagskrif wat inwoners gister aan die polisie oorhandig het, is hulle “geskok” oor die manier waarop die hof Nghuulivali se saak behartig het.
Die klagskrif voer aan daar was op die dag van Eiseb se moord 'n toesmeerdery en dat “onnodige vertragings” tot Nghuulivali se inhegtenisname gelei het.
Inwoners eis dat ander speurders as dié wat tot dusver die ondersoek behartig het, die saak moet hanteer.
Volgens die petisie is die vuurwapen waarmee Eiseb geskiet is, nooit gevind nie.
Die gemeenskap eis ook dat 'n staatsaanklaer van buite Tsumeb namens die staat moet optree.
Hulle sê hulle sal weer met hul plakkate voor die landdroshof gaan betoog op die dag wat die verhoor begin om die aandag op hul eise te vestig.
Nghuulivali het teruggekeer werk toe nadat hy op borgtog vrygelaat is en het selfs 'n openbare vergadering op 10 April toegespreek.
Dit het teenkanting van beide die Tsumeb-gemeenskap en binne polisiegeledere ontlok.
'gemeenskap leef in vrees'
Nghuulivali het op 28 Januarie vanjaar glo met sy Toyota-bakkie stilgehou waar Eiseb en twee vriende in die rigting van die veld geloop het.
Volgens me. Bertha Hangula, 'n familielid van Eiseb se twee vriende, het Nghuulivali na wat verneem word na die seuns gestap, sy vuurwapen uitgehaal en Eiseb vir geen rede in die kop geskiet.
Die ander twee seuns het weggehardloop.
“Die hele gemeenskap leef in vrees omdat die verdagte nie geskors is nie,” lui die klagskrif.
'n Polisiebeampte wat verkies om anoniem te bly, sê Nghuulivali moes “volgens wet” deur die polisie geskors gewees het toe hy in hegtenis geneem is en dat hy in aanhouding moes bly totdat hy op borgtog vrygelaat is.
Die beampte sê die erns van die klag teen Nghuulivali regverdig skorsing sonder die toestemming van die raad op skorsings.
Alternatiewelik moes Nghuulivali sewe dae kennis gekry het om voor die raad te verskyn, het hy bygevoeg.
Nghuulivali is op 16 Maart in hegtenis geneem.
Volgens artikel 23 van die polisiewet kan die inspekteur-generaal van die polisie enige lid van die polisie hangende 'n strafregtelike verhoor skors. Alternatiewelik moet 'n ondersoek na die bevoegdheid van die betrokke polisiebeampte gedoen word óf dissiplinêre stappe moet teen die beampte gedoen word.
Die wet bepaal ook dat die inspekteur-generaal 'n polisiebeampte moet skors vir enige tydperk wat hy of sy in aanhouding is of 'n vonnis uitdien.
Adj.komm. Edwin Kanguatjivi, polisiewoordvoerder, het gister gesê 'n arbiter is verlede Donderdag aangestel om 'n dissiplinêre ondersoek teen Nghuulivali te doen, maar dat 'n nuwe arbiter intussen aangestel sal word. Kanguatjivi sê Nghuulivali sal sewe dae kennis kry sodra 'n nuwe arbiter aangestel is.
“Die proses is aan die gang. Ons kan nie 'n saak aframmel nie. Die ondersoek duur voort,” het Kanguatjivi gesê.
Kommentaar
Republikein
Geen kommentaar is op hierdie artikel gelaat nie