Trump wou glo ondersoek na veiligheidsman stopsit

Die Amerikaanse president, Donald Trump, het na bewering vir James Comey, onlangs afgedankte FBI-hoof, gevra om die ondersoek na Michael Flynn, voormalige nasionale veiligheidsraadgewer, se bande met Rusland te staak.Dit word berig aan die hand van bronne wat glo 'n memorandum van Comey gelees het en volg 'n week nadat Trump hom afgedank het.Verlede week het Trump ook glo met Russiese amptenare in die Withuis vergader en “sensitiewe inligting” oor die Islamitiese Staat (IS) aan Sergei Lafrof, Russiese minister van buitelandse sake, oorgedra.Comey se memo, waaroor The New York Times berig het, het 'n herrie in die Amerikaanse hoofstad laat losbars, gepaardgaande met twyfel oor of Trump probeer het om by die federale ondersoek in te meng.Intussen het die Withuis wal gegooi teen dié beriggewing en in 'n verklaring gesê dit “is nie 'n ware of akkurate weergawe” van die gesprek tussen die president en Comey nie.Comey het glo die memo geskryf nadat hy met Trump in die Withuis vergader het die dag nadat Flynn op 14 Februarie in die pad gesteek is – omdat hy vermoedelik vir visepres. Mike Pence oor die omvang van sy gesprekke verlede jaar met Sergei Kisliak, Russiese ambassadeur, mislei het.Trump het aan Comey gesê hy hoop hy sal die ondersoek “kan laat vaar”, volgens 'n bron wat met die memo vertroud is.FBI'n Woordvoerder van die FBI wou nie kommentaar oor die besonderhede van die memo lewer nie. Kisliak was saam met Lafrof in die Withuis toe Trump glo die inligting aan hulle oorgedra het.The New York Times berig dat Trump in die vergadering in die Withuis te velde getrek het teen die uitlek van regeringsinligting aan die media en voorgestel het dat die FBI-direkteur verslaggewers vervolg wat geklassifiseerde inligting bekend maak.Lede van die Amerikaanse kongres is verder hierdeur omgekrap ná aantygings oor Trump se vergadering met die Russiese amptenare en die sensitiewe inligting wat glo oorgedra is.Republikeinse sowel as Demokratiese wetgewers wil dié memo onder oë kry. Richard Blumenthal, 'n senator van die Demokratiese Party, sê die memo gee sterk bewyse van dwarsboming van die gereg en bied die gronde vir 'n onmiddellike ondersoek deur 'n onafhanklike spesiale aanklaer.Jason Chaffetz, 'n Republikein en voorsitter van die Raad van Verteenwoordigers se oorsigkomitee, sê die komitee “sal die Comey-memo in die hande kry, indien dit wel bestaan”.“Ek moet dit eerder vroeër as later sien en het my pen vir dagvaardings gereed.” SPERDATUMChaffetz het in 'n brief aan Andrew McCabe, waarnemende FBI-direkteur, 'n sperdatum van 24 Mei gestel om “alle memorandums, notas, opsommings en opnames met betrekking tot enige kommunikasie tussen Comey en die president” te oorhandig.Paul Ryan, Republikeinse speaker van die Raad, het Chaffetz in sy versoek ondersteun. “Ons moet al die feite hê en dit is gepas dat die Raad se oorsigkomitee die memo aanvra,” sê AshLee Strong, Ryan se woordvoerder.Regskenners het nie 'n goeie indruk gehad van Trump se kommentaar soos dit in die memo vervat is nie.Prof. Erwin Chemerinsky, 'n kenner van konstitusionele reg en dekaan van die Universiteit van Kalifornië se Irvine School of Law, sê die president se bevel om 'n moontlike strafregtelike ondersoek te staak, kom neer op dwarsboming van die gereg.“Dit is wat laas daartoe gelei het dat pres. Richard Nixon bedank het.”Voorbedagte rade is egter 'n kernelement voordat 'n klag van dwarsboming van die gereg aanhangig gemaak kan word en Trump se woorde is onderhewig aan interpretasie en kan moontlik in die konteks van ander aksies, soos Comey se afdanking, geplaas word.Prof. Christopher Slobogin, 'n strafregkenner by die Vanderbilt-Universiteit se regskool, sê die feit dat Trump slegs sy “hoop” uitgespreek het dat die ondersoek na Flynn gestaak sal word, eerder as om dit te beveel, “sorg vir 'n swakker, dog haalbare saak”. – Netwerk24/Reuters

Trump wou glo ondersoek na veiligheidsman stopsit

Kommentaar

Republikein 2025-06-17

Meld asseblief aan om kommentaar te lewer

Trump wou glo ondersoek na veiligheidsman stopsit

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie