Trump het 'goeie' gevoel oor beraad met Kim

Die Amerikaanse president het gesê hy het ’n “goeie gevoel” oor die verwagte beraad.

Die Noord-Koreaanse staatsmedia het die moontlikheid geopper dat ’n “nuwe verhouding” met Amerika gebou kan word, berig die BBC.

Die geskiedkundige beraad tussen Kim Jong-oen van Noord-Korea en pres. Donald Trump vind vandag in Singapoer plaas.

Daar is ’n duidelike ommeswaai in dié geïsoleerde land se houding ná dekades van vyandigheid teenoor Amerika, berig die BBC.

Hy het Maandag getwiet dat daar “opwinding in die lug” in Singapoer is.

Trump hoop dat die beraad Kim van kernwapens sal laat afsien.

Die twee presidente wat in verskillende hotelle nie ver van mekaar af nie bly, sal vandag in ’n hotel in Sentosa, ’n gewilde toeriste-eiland ’n paar honderd meter van Singapoer, ontmoet.

Jonhap, ’n nuusagentskap in Suid-Korea, het berig dat senior diplomate van albei lande gister sou vergader om ’n ooreenkoms op te stel wat aan hul leiers voorgelê sal word.

Die staatsmedia in Noord-Korea berig nie gewoonlik oor die leier se aktiwiteite nie en die beraad is tot dusver net kortliks vermeld.

Maar ’n hoofartikel in Rodong Sinmun het bevestig dat Kim na Singapoer reis om Trump te ontmoet “om ’n nuwe verhouding te vestig om by veranderde vereistes van die nuwe era by te bly”.

Trump het Sondag in Singapoer aangekom nadat hy die G7-beraad in Kanada vroeg verlaat het. Terwyl hy na sy hotel vergesel is, het omstanders foto’s geneem met die polisie wat ’n wakende oog gehou het.

Hul beraad sal die eerste gesprek tussen ’n Amerikaanse president en ’n Noord-Koreaanse leier wees, hetsy van aangesig tot aangesig of telefonies.

Kim se aankoms in Singapoer was op sigself geskiedkundig. Hy het sedert 2011 selde sy land verlaat, hoewel hy in Maart na China gereis het en onlangs ook na Suid-Korea.

Noord-Korea het dekades lank kernwapens ontwikkel en verlede jaar telkens missiele afgevuur wat die Amerikaanse vasteland glo kon tref.

Trump het in reaksie daarop strenger sanksies teen Noord-Korea ingestel. Die twee leiers het mekaar ook oor en weer sleggesê. Daar was telkens sprake daarvan dat die toenemende spanning tussen Amerika en Noord-Korea tot militêre aksie kan oorgaan.

Voorts is Kim se lyfwagte afgeneem waar hulle langs sy limousine in Singapoer draf in aanloop tot die geskiedkundige beraad met Trump.

Daily Mail berig sy lyfwagte het langs ’n swart limousine gehardloop kort nadat hy Sondag by die Changi-lughawe aangekom het.

Beeldmateriaal wys die hoe die lyfwagte langs die motor, met swart ruite en twee groot Noord-Koreaanse vlae wat wapper, hardloop terwyl hulle hul leier na die nabygeleë St. Regis-hotel begelei.

Sy konvooi het meer as 20 voertuie, insluitend ’n ambulans, ingesluit.

Die lyfwagte was in April vanjaar ook in die nuus ná ’n video van hulle wat ook langs Kim se motor hardloop tydens die geskiedkundige vergadering met Suid-Korea.

Kim se reis na Singapoer is die verste wat hy tot dusver as leier gereis het, berig die BBC.

Volgens berigte is hy bekommerd dat iemand sal probeer om hom te vermoor. - Nampa/Reuters/Netwerk24