Trump: China, Rusland is 'vyandig' teenoor Amerika

Pres. Donald Trump het Maandag 'n nuwe veiligheidstrategie bekend gemaak waarin hy sê beperkings op die Amerikaanse verdedigingsbegroting is iets van die verlede.“Ongeëwenaarde mag is die besliste manier van verdediging, en om dié rede doen ons weg met die skadelike beperkings.” In 'n wydlopende toespraak het Trump gesê sy veiligheidstrategie is die eerste wat ekonomiese sekuriteit pak en sluit in die algehele herbou van Amerikaanse infrastruktuur, asook 'n muur langs die suidelike Amerikaanse grens.Hy het 'n beroep op Pakistan gedoen om beslissend teen terrorisme op te tree. Hy sê Amerika moet die uitdaging aanpak rakende Noord-Korea se wapenprogram.Trump het Rusland Maandag in sy nuwe nasionale veiligheidstrategie as 'n antagonis op die wêreldverhoog uitgesonder. Sy beleidsdokument bied 'n nugter ontleding van Rusland as mededinger, ondanks Trump se eie pogings vir hegter betrekking met pres. Wladimir Poetin.Trump se veiligheidstrategie weerspieël 'n siening wat lank deur Amerikaanse diplomate gehou is, dat Rusland aktief Amerikaanse belange tuis en in die buiteland ondermyn. Die Amerikaanse kongres vereis dat elke Amerikaanse administrasie sy nasionale veiligheidstrategie uiteensit. Die nuwe Trump-strategie word sterk beïnvloed deur die idees van die beste nasionale veiligheidsamptenare eerder as dié van die president self, het 'n amptenaar betrokke by die voorbereiding van die dokument gesê.Volgens uittreksels wat deur die Withuis beskikbaar gestel is, weerspieël Trump se strategie sy beleid van “Amerika Eerste”. Die prioriteite is om Amerika se tuisland en grense te beskerm, die weermag te herbou, mag in die buiteland te projekteer en 'n handelsbeleid te bevorder wat gunstiger is vir Amerika.Trump se strategiedokument sonder China en Rusland uit as mededingers wat Amerika se mag wil uitdaag en die land se veiligheid en voorspoed wegkalwe.“Hulle is vasbeslote om ekonomieë minder vry en minder regverdig te maak, om hul weermag groter te maak en om inligting en data te beheer om hul samelewings te onderdruk en hul invloed uit te brei,” aldus uittreksels van Trump se strategie wat deur die Withuis uitgereik is.Die uitsondering van China en Rusland as “revisionistiese magte” weerspieël die omsigtigheid van die Trump-administrasie, ten spyte van Trump se eie pogings om beter betrekkinge met Poetin en pres. Xi Jinping van China op te bou. 'n Senior regeringsamptenaar het op 'n inligtingsvergadering aan verslaggewers gesê Rusland en China probeer om die wêreldwye status quo te hersien; Rusland in Europa - met sy militêre aanvalle in die Oekraïne en Georgië, en China in Asië deur sy aggressie in die Suid-Chinese see.Ingevolge Trump se veiligheidstrategie sal kritieke Amerikaanse infrastruktuur teen kuberkrakers beskerm word en kwaadwillige kuberkrakers streng vervolg word. China en Rusland word dikwels van kuberaanvalle teen Amerikaanse teikens beskuldig, bewerings wat hulle ontken.Trump het saam met Xi gewerk om druk op Noord-Korea uit te oefen oor sy kern- en ballistiese missielprogramme, maar het weinig vordering gemaak met sy onderneming om gunstiger handelsooreenkomste vir Amerika te beding om sy handelstekort te verminder. Dit het in 2016 sowat US$347 miljard beloop.Die Trump-regering waarsku ook dat diefstal van intellektuele eiendom deur China 'n nasionale veiligheidsprobleem is.Die komitee oor buitelandse belegging wat die aankoop van Amerikaanse bates deur buitelandse maatskappye nagaan, het onlangs sterk standpunt ingeneem teen tegnologie-oordrag aan Chinese maatskappye.Klimaatsverandering is weggelaat uit Trump se strategie. Sy voorganger, Barack Obama, het klimaatsverandering as 'n veiligheidsbedreiging vir Amerika bestempel.Trump wil Amerika van die Paryse klimaatooreenkoms onttrek tensy daar veranderinge aangebring word.– Netwerk24/Reuters

Trump: China, Rusland is 'vyandig' teenoor Amerika

Kommentaar

Republikein 2026-05-05

Meld asseblief aan om kommentaar te lewer

Trump: China, Rusland is 'vyandig' teenoor Amerika

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.