TransNamib ignoreer 'n kabinetsbevel
TransNamib beplan om teen 'n hofuitspraak te appelleer om sy aandele in die Swakopmund Hotel and Entertainment Centre te behou.
Mathias Haufiku
TransNamib Holdings het 'n bevel van die kabinet geïgnoreer wat die spoorwegmaatskappy wil weerhou om teen 'n hofuitspraak van September 2020 te appelleer.
Die hof het beslis die maatskappy moet sy 50%-aandele in die Swakopmund Hotel and Entertainment Centre aan sy vennoot vir N$5 miljoen verkoop. Die hotel word op sowat N$350 miljoen gewaardeer.
TransNamib en Stocks and Stocks Leisure Namibia is gelyke aandeelhouers in die gesamentlike onderneming, met N$111 miljoen se laste en 'n batebasis van altesaam N$65 miljoen.
Die uitvoerende hoof van TransNamib, mnr. Johny Smit, het bevestig die appèlaansoek is verlede maand ingedien.
Stocks and Stocks beskuldig TransNamib dat hy nie sy finansiële verpligtinge teenoor die onderneming nagekom het nie, terwyl die spoorwegmaatskappy beweer sy vennoot het nie die onderneming goed bestuur nie. TransNamib voer verder aan hy het sedert die oprigting van die hotel 26 jaar gelede geen dividende ontvang nie.
JOOSTE EN TJIJOROKISA
Amptelike korrespondensie tussen die minister van staatsondernemings, mnr. Leon Jooste, en die voorsitter van TransNamib se direksie, adv. Sigrid Tjijorokisa, toon dat die minister so ver gegaan het dat hy die kabinet beywer het om enige appèlaansoeke te keer. Dit ten spyte daarvan dat die direksie besluit het dit is “nie in die maatskappy se beste belang” om nie te appelleer nie.
Jooste het op 23 November 2020 aan Tjijorokisa geskryf dat TransNamib nie teen die hofuitspraak moet appelleer nie en dat hy aan die beslissing moet voldoen.
“'n Oplossing vir hierdie aangeleentheid is vir 'n onaanvaarbare uitgerekte tydperk onnodig vertraag en het die vermoë van die entiteit om optimaal te funksioneer in gevaar gestel, terwyl die lewensbestaan van die werknemers die afgelope maande, as gevolg van die dooiepunt, ook negatief beïnvloed is,” het hy geskryf.
Die direksie het by monde van Tjijorokisa ses dae later geantwoord dat teen die beslissing geappelleer moet word, omdat “die uitspraak nadelig was”.
CCOPP WORD BETREK
Nadat die direksie geweier het om sy voorskrifte na te kom, het Jooste daarin geslaag om die kabinetskomitee oor algehele beleid en prioriteite (CCOPP) te oorreed om in te gryp. Pres. Hage Geingob is die voorsitter van dié komitee.
“Die CCOPP beveel die minister van staatsondernemings om TransNamib opdrag te gee om die uitspraak van die hoërhof te gehoorsaam en om ten gunste van Stocks and Stocks die appèl te laat vaar,” skryf Jooste op 11 Desember 2020 in 'n brief aan die direksie.
Volgens dié brief het die CCOPP ook die minister gemagtig om Stocks and Stocks te beveel om dringend die 178 werknemers van die hotel weer in diens te neem en uitstaande salarisse vanaf Maart 2020 te betaal.
Die direksie het op 23 Desember 2020 geantwoord die maatskappy sal nie die appèlproses laat vaar nie.
Jooste het gesê die saak moet in die belang van die werknemers afgehandel word, maar Tjijorokisa het geskryf die direksie word nie deur sy skielike ommekeer geflous is nie.
“Dit is verbasend hulle wil nou die kwessie van personeel as verswarende omstandighede gebruik, terwyl mense wat direk deur hulle aangestel is gunstiger voordele ontvang en steeds betaal word.
“Die bogenoemde redes word deur die direksie ondersteun. Dit is ons voorlegging aan u agbare kantoor om TransNamib se appèlaansoek te ondersteun,” het Tjijorokisa gesê.
Die minister het Maandag gesê hy het die saak met die direksie bespreek sodat hy meer begrip van hul standpunt kan kry.
“Ná afloop van die konsultasies het ek na die kabinet teruggekeer om toestemming te vra dat 'n alternatiewe oplossing gevind word en ons konseptualiseer dit tans,” het hy gesê.
– [email protected]
TransNamib Holdings het 'n bevel van die kabinet geïgnoreer wat die spoorwegmaatskappy wil weerhou om teen 'n hofuitspraak van September 2020 te appelleer.
Die hof het beslis die maatskappy moet sy 50%-aandele in die Swakopmund Hotel and Entertainment Centre aan sy vennoot vir N$5 miljoen verkoop. Die hotel word op sowat N$350 miljoen gewaardeer.
TransNamib en Stocks and Stocks Leisure Namibia is gelyke aandeelhouers in die gesamentlike onderneming, met N$111 miljoen se laste en 'n batebasis van altesaam N$65 miljoen.
Die uitvoerende hoof van TransNamib, mnr. Johny Smit, het bevestig die appèlaansoek is verlede maand ingedien.
Stocks and Stocks beskuldig TransNamib dat hy nie sy finansiële verpligtinge teenoor die onderneming nagekom het nie, terwyl die spoorwegmaatskappy beweer sy vennoot het nie die onderneming goed bestuur nie. TransNamib voer verder aan hy het sedert die oprigting van die hotel 26 jaar gelede geen dividende ontvang nie.
JOOSTE EN TJIJOROKISA
Amptelike korrespondensie tussen die minister van staatsondernemings, mnr. Leon Jooste, en die voorsitter van TransNamib se direksie, adv. Sigrid Tjijorokisa, toon dat die minister so ver gegaan het dat hy die kabinet beywer het om enige appèlaansoeke te keer. Dit ten spyte daarvan dat die direksie besluit het dit is “nie in die maatskappy se beste belang” om nie te appelleer nie.
Jooste het op 23 November 2020 aan Tjijorokisa geskryf dat TransNamib nie teen die hofuitspraak moet appelleer nie en dat hy aan die beslissing moet voldoen.
“'n Oplossing vir hierdie aangeleentheid is vir 'n onaanvaarbare uitgerekte tydperk onnodig vertraag en het die vermoë van die entiteit om optimaal te funksioneer in gevaar gestel, terwyl die lewensbestaan van die werknemers die afgelope maande, as gevolg van die dooiepunt, ook negatief beïnvloed is,” het hy geskryf.
Die direksie het by monde van Tjijorokisa ses dae later geantwoord dat teen die beslissing geappelleer moet word, omdat “die uitspraak nadelig was”.
CCOPP WORD BETREK
Nadat die direksie geweier het om sy voorskrifte na te kom, het Jooste daarin geslaag om die kabinetskomitee oor algehele beleid en prioriteite (CCOPP) te oorreed om in te gryp. Pres. Hage Geingob is die voorsitter van dié komitee.
“Die CCOPP beveel die minister van staatsondernemings om TransNamib opdrag te gee om die uitspraak van die hoërhof te gehoorsaam en om ten gunste van Stocks and Stocks die appèl te laat vaar,” skryf Jooste op 11 Desember 2020 in 'n brief aan die direksie.
Volgens dié brief het die CCOPP ook die minister gemagtig om Stocks and Stocks te beveel om dringend die 178 werknemers van die hotel weer in diens te neem en uitstaande salarisse vanaf Maart 2020 te betaal.
Die direksie het op 23 Desember 2020 geantwoord die maatskappy sal nie die appèlproses laat vaar nie.
Jooste het gesê die saak moet in die belang van die werknemers afgehandel word, maar Tjijorokisa het geskryf die direksie word nie deur sy skielike ommekeer geflous is nie.
“Dit is verbasend hulle wil nou die kwessie van personeel as verswarende omstandighede gebruik, terwyl mense wat direk deur hulle aangestel is gunstiger voordele ontvang en steeds betaal word.
“Die bogenoemde redes word deur die direksie ondersteun. Dit is ons voorlegging aan u agbare kantoor om TransNamib se appèlaansoek te ondersteun,” het Tjijorokisa gesê.
Die minister het Maandag gesê hy het die saak met die direksie bespreek sodat hy meer begrip van hul standpunt kan kry.
“Ná afloop van die konsultasies het ek na die kabinet teruggekeer om toestemming te vra dat 'n alternatiewe oplossing gevind word en ons konseptualiseer dit tans,” het hy gesê.
– [email protected]
Kommentaar
Republikein
Geen kommentaar is op hierdie artikel gelaat nie