Trae vordering in Fishrot-saak

Marc Springer – Meer as 18 maande ná hul inhegtenisneming wag tien Fishrot-beskuldigdes steeds op ’n begindatum vir hul verhoor, met administratiewe probleme wat die saak voortdurend vertraag.Tydens voorverhoorverrigtinge wat gister in Windhoek voor hoërhofregter Christie Liebenberg gehou is, het die staat en die verdediging tóg vordering gemaak toe hulle ooreengekom het op datums vir die indiening van dokumente en die verhoor van ’n aansoek om ’n samevoeging, wat vroeër deur staatsaanklaer Edmund Marondedze gebring is. In die aansoek wil die staat twee sake rakende die beweerde korrupsie kombineer wat tans afsonderlik hanteer word.Aangesien sommige advokate wat verskillende beskuldigdes en korporatiewe entiteite verteenwoordig die versoek teenstaan, is 'n afsonderlike verhoor vir die samevoegingsaansoek nodig.Volgens die ooreenkoms wat gister bereik is, is dié verhoor nou vir 12 Julie geskeduleer wat die weg vorentoe in die verhoor sal bepaal.Die prokureur mnr. Richard Metcalfe het opnuut kommer uitgespreek oor die feit dat die beskuldigdes byna 19 maande ná hul inhegtenisneming nog geen datum vir die aanvang van hul verhoor het nie, wat daarop dui dat die staat se ondersoek na die saak onvolledig voorkom. Metcalfe verneem glo van mediabronne dat ’n versoek om die uitlewering van drie Yslanders geweier is en dat daar nog geen aanduiding is wanneer die prokureur mnr. Marén de Klerk uit Suid-Afrika uitgelewer sal word nie, en of dit enigsins gaan gebeur nie.De Klerk is die vermeende betaalmeester in die Fishcor-viskwotaskandaal, terwyl die Yslandse burgers mnre. Egill Helgi Arnason, Ingvar Juliusson en Helgason Adalsteinn tereg staan as verteenwoordigers van Saga Seafood, Esja Investment en Heinaste Investments, asook in hul persoonlike hoedanigheid. Metcalfe het aan die hof gesê ’n lys van getuies wat glo in die komende verhoor sou getuig, doen op sosiale media die ronde en dat twee van die getuies hom ingelig het dat hulle nog nie ’n verklaring by die polisie of die Teenkorrupsiekommissie (ACC) afgelê het nie. Dit wou dus voorkom asof die staat steeds nie sy ondersoek afgehandel het nie en nie in staat was om voort te gaan met die verhoor nie.Die beskuldigdes, onder wie die gewese visseryeminister mnr. Bernhard Esau, mnre. Tamson en James Hatuikulipi en mnr. Ricardo Gustavo staan tereg op verskeie klagte wat verband hou met die gebruik van visvangkwotas wat aan Namgomar Pesca Namibië toegeken is en deur Yslandse maatskappye benut is.In ’n afsonderlike saak wat moontlik met die Namgomar-saak gekombineer moet word, staar soortgelyke klagte die gewese minister van justisie, mnr. Sacky Shanghala, saam met mnre. Pius Natangwe Mwatelulo, Esau, die Hatuikulipi-broers, die voormalige uitvoerende hoof van Fishcor, mnr. Mike Nghipunya en mnre. Otneel Shuudifonya en Phillipus Mwapopi in die gesig.In dié saak word die beskuldigdes aangekla van die wanbesteding van sowat N$120 miljoen, wat vermoedelik aan Fishcor betaal is vir die gebruik van visvangkwotas.Die beskuldigdes bly in aanhouding ná verskeie mislukte borgtog-aansoeke. – republikein@republikein.com.na

Trae vordering in Fishrot-saak

Kommentaar

Republikein 2025-09-19

Meld asseblief aan om kommentaar te lewer

Trae vordering in Fishrot-saak

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie