TPP sonder Amerika ‘steeds moontlik’

Amerika het hom onttrek aan die Trans-Pasifiese Vennootskap (TPP), ’n handelsooreenkoms tussen 12 lande, maar Australië wil voortgaan met die ooreenkoms sonder Amerika.Pres. Donald Trump het Maandag ’n uitvoerende bevel onderteken om Amerika te onttrek aan die ooreenkoms.Steven Ciobo, Australië se minister van handel, het Dinsdag gesê die TPP sonder Amerika is “steeds ’n opsie wat baie moontlik is”.Malcolm Turnbull, Australië se eerste minister, het die handelsooreenkoms met die leiers van Japan, Nieu-Seeland en Singapoer bespreek en hoe hulle dit kan red.“Ons werk almal saam om te kyk hoe ons die momentum van oop markte en vrye handel kan verseker,” sê Turnbull.“Om Amerika in die TPP te verloor is ’n groot verlies – daar is geen twyfel daaroor nie – maar ons is nie bereid om weg te stap van ons verbintenis tot Australiese werkgeleenthede nie,” sê hy.Trump het reeds herhaaldelik handelsooreenkomste geblameer vir verliese aan Amerikaanse werkgeleenthede, veral in die vervaardigingsbedryf, maar Asiatiese lande, waaronder Japan, het hom in ’n laaste poging tevergeefs probeer oortuig van die meriete daarvan.Die TPP-ooreenkoms is ook beskou as ’n strategie teen die toenemende Chinese militêre en ekonomiese mag in die streek.’n TPP sonder Amerika gaan egter moeilik wees en Japan, naas Amerika die grootste ekonomie in dié ooreenkoms, oorweeg nie tans ’n TPP sonder Amerika nie, het ’n staatsamptenaar gesê.“Ons sal voortgaan om Amerika te probeer oorreed van die strategiese en ekonomiese voordele daarvan,” sê Hiroshige Seko, Japan se minister van handel. Dit is belangrik dat die grootste ekonomie, Amerika, deel bly van die ooreenkoms, sê hy.Singapoer, wat afhanklik is van uitvoer en wat een van die grootste moontlike verloorders van ’n afname in internasionale handel sal wees, het ook aangedui hy gaan druk toepas om die TPP te behou, selfs sonder Amerika. Volgens Singapoer is dit beter om ’n verswakte TPP te hê as geen ooreenkoms nie.Bill English, Nieu-Seeland se eerste minister, sê die eerste prys is dat Amerika deel bly van die TPP, maar dat die ooreenkoms “steeds waarde het” sonder Amerika. Netwerk24/Bloomberg

TPP sonder Amerika ‘steeds moontlik’

Kommentaar

Republikein 2025-11-05

Meld asseblief aan om kommentaar te lewer

TPP sonder Amerika ‘steeds moontlik’

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.