Township se sakelui kla oor sigaret-wet

Francois Williams – Nuwe voorgestelde wetgewing wat handelsmerk-vrye sigaretpakkies afdwing asook rook in openbare plekke verder verbied, gaan vernietigend wees vir kleinsake-eienaars in arm woonbuurte.Só beweer die Suid-Afrikaanse Spaza- en Snoepwinkelvereniging (Sasta).Sasta is een van ’n paar organisasies wat vandeesweek vir oulaas hul stem dik maak teen die konsepwetsontwerp oor die beheer van tabakprodukte en elektroniese leweringstelsels, waarvan die spertyd vir openbare kommentaar op 9 Augustus sluit.Die wetgewing wil die verkoop van een-een sigarette verbied, sigarette mag nie sigbaar vertoon word nie, en die verpakking mag nie handelsmerke vertoon nie.Sasta sê die wetgewing is onvanpas vir spaza- en snoepwinkeleienaars in arm informele woonbuurte soos plakkerskampe want dit is onprakties om toe te pas. Die wetsvoorskrifte kan nie in sulke klein informele winkeltjies toegepas word nie want hulle is te klein en die meeste eienaars is te arm en ongesofistikeerd, beweer Sasta.Vir elkeen wat sigarette wil koop sal die winkeleienaar in ’n wegsteekplek na die sigarette moet soek, wat almal verpak word in identiese, ongemerkte verpakking. Dit sal Sasta-lede blootstel aan ’n groter risiko vir diefstal en aanvalle.Rose Nkosi, president van Sasta, verduidelik die meeste van hul lede se sigaretverkope is juis enkelsigarette. “Ons klante kan nie bekostig om volledige pakkies te koop nie, veral nie teen pryse waarop die regte belasting gehef word nie.As slegs vol pakke beskikbaar is, sal ons klante net onwettige sigarette kan bekostig. Dié maatreël verbied effektiewelik ons hele sigarethandel. Soos met die verbod op die vertoon van sigarette sal dit al ons lede dwing om die wet te oortree of toe te maak.”Nkosi meen dit lyk asof die wetgewing die informele ekonomie wil vernietig.Die eKasi Entrepreneurship Movement het in ’n verklaring gesê hy steun die departement van gesondheid se doelwit om Suid-Afrikaners se gesondheid te beskerm en bevorder, maar die beweging glo die wetgewing sal mense se regte skend.Groot winkelgroepe soos Pick n Pay kan agterkamers hê om hul tabakprodukte weg te steek, maar klein ondernemings het nie sulke infrastruktuur nie, sê eKasi. Hulle wil hê die regering moet die wetgewing heeltemal hersien. – Netwerk24

Township se sakelui kla oor sigaret-wet

Kommentaar

Republikein 2025-05-01

Meld asseblief aan om kommentaar te lewer

Township se sakelui kla oor sigaret-wet

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie