Tour de Windhoek sal die beste uitsif

Andrew Poolman - Spanwerk en 'n hewige taktiese stryd sal bepaal of Namibië se padfietsryers die knoop kan deurhaak om die spogregte van die 2018 Tour de Windhoek teen die beroepspanne van Suid-Afrika te beklink.Die toer van drie dae en vyf skofte begin vandag en word Sondagoggend afgesluit. Besonderhede oor die vyf skofte word vervat in die naweek se sportprogram op bl. 22.Altesame 15 spanne, insluitend drie van Suid-Afrika se voorste professionele manspanne, sal sake uitspook in die vyf skofte wat oor omtrent 400 kilometer strek.Verlede jaar se algehele kampioen, Steven van Heerden, is terug om sy titel te verdedig, met die steun van sy BCX-spanmaats wat onder andere Nolan Hoffmann (gewese wenner van onder meer die Namibian Cycle Classic en die Kaapstad-fietstoer) insluit.Van Heerden het reeds aan die SA media gesê die Namibiese ryers het verlede jaar gewys hulle is ewe sterk as die besoekers. “Die eerste skof is bepalend, maar elke skof is op sy eie manier moeilik. Ons span sal elke skuif deur die opposisie moet dophou en sal so min as moontlik energie moet verbruik.”Nog 'n Suid-Afrikaanse span wat verlede jaar hier sterk presteer het, is Pro Touch wat met name soos Jayde Julies, Mitch Elliot en Reynard Butler weer onder die gunstelinge sal tel om op verlede jaar se tweede posisie te verbeter.Die derde Suid-Afrikaanse inskrywing, die ACDC Luso-span, is 'n nuwe kombinasie met ryers soos Calvin Beneke (2017 algehele naaswenner in BCX-kleure), Casper Kruger en Jandrich Kotze.Die aanslag van die Namibiese spanne kan egter nie onderskat word nie. Team Hollard se kombinasie van Drikus Coetzee, Xavier Papo, Gerhard Mans junior, Alwyn Steenkamp en die Suid-Afrikaner Travis Barret kan die wêreld vir enigiemand warm maak.Team Kia bevat André de Klerk, Fanie Steenkamp en Danzel de Koe en hul spanwerk word nie maklik geklop nie.In die geel kleure van Mannie's Bike Mecca is die driekampspesialis Jean-Paul Burger, Alex Miller en Tjipe Murangi almal bekend vir hul veggees, terwyl Team NCCS met Lotto Petrus, Fiffy Kashululu en Ananias Ananias ook na 'n waardige mededinger lyk.In die vrouekompetisie het vier spanne ingeskryf. Verlede jaar se individuele kampioen, Michelle Vorster, is pas terug van Italië waar sy met 'n goeie vertoning 15de in die bergfietsry marathon wêreldkampioenskap geëindig het.Vorster en haar Team Jaguar-spanmaats soos Irene Steyn en Suzanne Borg behoort die gunsteling te wees teen die uitdaging wat Team R&R Importers, Team Pupkewitz Megabuild en Team Dolce inhou.Groot PrysgeldDie totale prysgeld van N$160 000 is betekenisvolle aansporing vir die besoekende en plaaslike jaers om die pap dik aan te maak.Die individuele manswenner van die Tour de Windhoek verdien N$15 000, terwyl die tweede en derde plekke onderskeidelik N$11 000 en N$8 000 werd is.Verdere pryse van N$5 000 elk wag op die koning van die berge, die beste naelryer en die beste jong ryer.Die korter afstande van die Tour de Windhoek Light (drie skofte oor 210 km) is net vir soloryers en vrouespanne ding ook op die roete mee.Die vrouewenner sal met N$12 000 wegstap, die naaswenner met N$8 000 en derde plek met N$5 000.Die Tour de Windhoek is Namibië se eie internasionale padfietstoer wat in 1990 ontstaan het en wat 'n paar keer doodgeloop het voordat borgskappe deur Hollard en die Pupkewitz-groep dit verlede jaar met mening laat herleef het.

Tour de Windhoek sal die beste uitsif

Kommentaar

Republikein 2026-05-05

Meld asseblief aan om kommentaar te lewer

Tour de Windhoek sal die beste uitsif

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.