Tour de Windhoek nou in Oktober

Organiseerders het die Pupkewitz Tour de Windhoek met twee weke uitgestel, sodat dit nou vir 2 en 3 Oktober geskeduleer is.

Mannie Heymans, organiseerder van die toer, het in die aankondiging gesê die nuwe datum gee fietsryers meer tyd om hulle gereed te kry en reëlings te tref om in die hoofstad aan te meld.

“Die organiseerders het tesame met die Pupkewitz-groep as hoofborg besluit om die byeenkoms uit te stel. Die uitstel gee ons ook tyd om 'n veilige en kompeterende byeenkoms te kan aanbied.

“Ons moedig padfietsryers aan om in te skryf en om nie hierdie wonderlike geleentheid mis te loop om teen die bestes in die land mee te ding nie. Onthou die kriterium-skof sal oop wees vir alle deelnemers – nie net vir die manspanne soos in die verlede nie, wat 'n bykomende hoogtepunt sal wees.

“Saam met Pupkewitz volg ons die riglyne van die regering m die gesondheid en veiligheid van alle deelnemers te beskerm. Op hierdie oomblik is dit nog onseker of enige openbare byeenkoms met meer as tien mense ná 12 September toegelaat sal word.”