Total wil sy boorgatkop op seebodem los

Francois Williams – Die Franse oliegroep Total wat nuwe gasbronne aan die Suid-Kaapse kus ontdek het, het in Desember toestemming gevra dat sy boorgat-toerusting (oftewel die boorgatkop) op die seebodem gelaat word as hy klaar is met die Brulpadda-boorgat.

Dit blyk uit die dokumentasie oor sy aansoek om ’n wysiging aan sy omgewingsbestuurprogram van die departement van omgewingsake te kry.

Total se dilemma is dat die eksplorasiegebied reg in die pad van die sterk Agulhas-seestroom is, en volgens Total maak die gure diepsee-weer en onvoorspelbaarheid van die sterkte en rigting van die seestroom dit uiters moeilik om sy boorgatkop veilig van die seebodem af te kan verwyder as hy klaar geboor het.

Hy het daarom aansoek gedoen om dit net so op die seebodem agter te laat.

Die omgewingskonsultant SLR het die omgewingsimpakstudie vir Total gedoen. Die aansoek vir wysiging is van 13 November tot 13 Desember 2018 vir openbare kommentaar gepubliseer.

Die risiko om die boorgatkop op die seebodem agter te laat is egter dat dit die toerusting van diepsee-vistreilers kan beskadig wanneer hulle in die gebied sou wou visvang. Die sleeptoue en sleepnet van die vistreiler kan aan die boorgatkop vashaak en beskadig word. Maar Total voer aan dieselfde rede waarom hy nie sy toerusting veilig kan verwyder nie, geld ook die vistreilers. Die onherbergsame diepseegebied is volgens hom nie geskik vir sleepnet-treilers om vis te vang nie weens die slegte weer.

Die gebied waar Total geboor het en die gasbronne gevind het, is sowat 175 km suid van Plettenbergbaai. Die eksplorasieblok is Blok 11B/12B.

Total beoog om nog soveel as 10 eksplorasieboorgate in die blok te sink.

Die huidige omgewingsbestuursprogram spesifiseer dat Total die boorgatkop van die seebodem af moet verwyder aan die einde van bedrywighede.

Total sê in sy risikoverslag die uitdaging om die boorgatkop te verwyder sluit in die vereiste om te moet wag vir geskikte weer, die swak betroubaarheid van weervoorspelling in dié oseaan-omgewing, en die risiko dat die boortoring sy posisie kan verloor.

As die boorgatkop eers verwyder is, kan ’n mens nie weer in die toekoms toegang kry tot die spesifieke boorgat nie. Die hele operasie om dit te verwyder is so kompleks en gevaarlik dat dit meer omgewingskade kan aanrig as om dit net daar op die seebodem te los, meen Total.

Dit kan drie tot vyf ononderbroke dae duur om so ’n boorgatkop te verwyder, maar weens die onvoorspelbaarheid van die Agulhas-seestroom is daar geen betroubare weervoorspellings om ’n veilige weervenster te identifiseer wat drie tot vyf dae se ononderbroke bedrywighede kan verseker nie.

Die boorgatkop steek sowat 3,5 m bo die seebodem uit. Volgens Total kan ’n struktuur wel oor die boorgatkop geïnstalleer word wat sal keer dat iets soos vistreilers se sleepnette daaraan sal vashaak. Die konsultante CapMarine wat ’n verslag oor die impak van die boorgatkop op visserybedrywighede gedoen het, het in hul verslag in November wel aanbeveel dat Total so ’n struktuur bo-oor die boorgatkop installeer, hoewel daar nie enige visserybedrywighede in die spesifieke gebied is nie weens die waterdiepte. Die moontlikheid word nie uitgesluit dat kommersiële visvangbedrywighede in die toekoms in die gebied sal ontstaan nie, sê CapMarine in hul verslag. – Netwerk24