Total se gasontdekking ‘nie aardskuddend’

Francois Williams – Die Franse oliereus Total se gasontdekking aan die Suid-Kaapse kus gaan geensins die geweldige uitwerking hê as wat voorgegee word nie.Dis wel ’n kleinerige vonds wat die sakeplan vir skaliegas in die Karoo deurmekaar kan krap.Stephen Clark, ’n Amerikaner wat aan sy doktorsgraad in meganiese ingenieurswese aan die Universiteit Stellenbosch werk, het Woensdag by ’n praatjie by die ingenieursfakulteit gesê op grond van sy kennis van olie- en gasvelde in die res van Afrika is die gasbronne wat in die sogenaamde Brulpadda-veld ontdek is, nader aan sowat 1 900 miljard kubieke voet (1,9 tcf in bedryfsterme) teenoor Total se raming van sowat 5 tcf.Clark, wat wye internasionale ervaring in die olie- en gasbedryf het en 20 jaar lank in olie-eksplorasievelde in Afrika gewerk het, gee toe hy het nie toegang tot Total se inligting nie. Hy grond sy berekeninge op sy kennis van soortgelyke velde elders in Afrika en op die inligting wat reeds in die openbare domein is.’n Gasveld van 1,9 tcf is nie aardskuddend groot nie. As 80% van die gas ontgin kan word, gee dit sowat 1,5 tcf, wat oor ’n tydperk van 20 jaar 45 miljard kubieke meter gas sal oplewer.Clark glo nie dit is ’n revolusionêre ontdekking wat Suid-Afrika se energielandskap sal transformeer nie, maar sal ten minste aan PetroSA se gas-tot-brandstofaanleg by Mosselbaai ’n verlenging van sy leeftyd bied.Die gas is volgens sy berekeninge genoeg om ’n gaskragstasie van 1 300 MW aan die gang te hou as dit die helfte van die tyd bedryf word. As dit benut word vir ’n spitstydkragstasie wat net 10% van die tyd loop, kan dit tot 13 000 MW se krag bied.Vergeleke met skaliegas in die Karoo sal dit meer sakesin maak om die diepsee-gas te ontwikkel, meen Clark.Dit kos $100 miljoen om ’n boorgat in die diepsee te vestig en net $20 miljoen om ’n skaliegasboorgat op land te vestig.Maar diepsee-gasvelde verg gewoonlik net enkele boorgate wat groot hoeveelhede gas per boorgat lewer, teenoor skaliegasontginning op land wat talle boorgate verg wat elkeen maar net ’n beperkte hoeveelheid gas lewer. Al is die koste per boorgat dus duurder, is die koste per kubieke meter gas wat ontgin word sowat 1 Amerikaanse sent vir diepsee-gas en 18 Amerikaanse sent vir skaliegas op land.Hoe vind jy olie of gas?Drie elemente is nodig om ’n ondergrondse vonds van olie of gas te vind: die kombuis (die bronreserwe waar die olie of gas vandaan kom), ’n strik (’n geologiese formasie wat die olie of gas binne ’n bepaalde gebied vaskeer), en ’n seël (’n struktuur soos ’n koepelvormige rotslaag wat keer dat die olie of gas ontsnap).Eksplorasiemaatskappye ontleed seismiese data om te besluit waar dié elemente is, maar eers wanneer ’n boorgat gesink word, vind hulle uit of hul ontleding reg was.Die alternatief van ’n strukturele seël is ’n sogenaamde stratigrafiese strik waar die verskil in porositeit of deurdringbaarheid van rotslae die seël vorm. Dit is egter baie moeiliker om te vind.Die omvang van die veld word bepaal deur die volume en digtheid van die formasie.Die eerste aanduiding van of hul vermoedens reg was, is die materiaal wat van die boorgat gekry word – of dit sand of skalierots is – en van instrumente binne-in die boorskag.Die porositeit en waterinhoud van die gesteentes gee ook ’n aanduiding.Clark verwys na die WNNR se verslag oor Karoo-skaliegas wat raam dat boorgate daar 110 miljoen kubieke meter gas kan oplewer, teenoor PetroSA se FO-gasveld in die diepsee wat 10 miljard kubieke meter gas per boorgat opgelewer het.PetroSA staan die laaste paar jaar bykans stil, so hoewel Total se gasvonds nie regtig ’n reuse-uitwerking gaan hê wat Suid-Afrika een van die olie- en gasuitvoerlande maak nie, sal dit ’n nis vul en die bestaande aanleg van PetroSA is in ’n ideale posisie om die gas te benut.Dit maak die droom van skaliegas uit die Karoo soveel ingewikkelder en skaliegas sal moeilik daarmee kan meeding.Dit sal ook meer diepsee-eksplorasie aanmoedig.Oor hoekom PetroSA self nie al vroeër suksesvol was met gasontdekkings nie, meen Clark PetroSA het ou tegnologie gebruik en in vlakker water probeer soek.Volgens Clark kan dit egter nog tot 10 jaar duur voordat die eerste produksie gelewer word, en dit kan dalk te laat wees vir PetroSA. Hulle sal op ’n manier tot dan aan die lewe moet bly of die aanleg sluit tot dan. – Netwerk24

Total se gasontdekking ‘nie aardskuddend’

Kommentaar

Republikein 2025-06-09

Meld asseblief aan om kommentaar te lewer

Total se gasontdekking ‘nie aardskuddend’

Kommentaar

Republikein 2025-06-09

Meld asseblief aan om kommentaar te lewer

MELD AAN

Advertensie