Topvyf verdien nasionale truie

Tielman van LillAlex Miller, Michelle Vorster (elite mans en vroue), Steffanie Grossmann (o.23-vroue), Hugo Hahn en Monique du Plessis (junior mans en vroue) het Sondag by Farm Windhoek in Kleine Kuppe hul onderskeie UCI-kategorieë by die Nedbank nasionale bergfietskampioenskap gewen.Die jeugdige Miller (19) het verlede jaar ook die elite manstitel ingepalm en suksesvol daarin geslaag om sy trui teen Tristan de Lange te verdedig. Hy het die ewe gedugte De Lange met meer as drie minute uitgestof.Miller vertel: “Ek weet nie wat die vorige week verkeerd gegaan het toe Tristan my by die laaste kompetisie geklop het nie. Dalk het ek te veel druk op myself geplaas en my bene het net nie opgedaag nie.“Ek is verlig en bly dat ek weer die Namibiese elite kampioen kan wees. Ek het verlede Woensdag besluit om die FLM individuele padtydtoets as ’n proeflopie te ry. Dit was bloot ’n eksperiment om te sien of ek reg vir die nasionale bergfietskampioenskap was en om myself harder te druk. “Vir die res van die week het ek ontspan en van Sondag se kompetisie vergeet. Lyk my dit het nogal gehelp, want ek was baie meer ontspanne toe ons begin jaag het. Ek wou vanuit die staanspoor die pas aangee. Ek en Tristan het saam die eerste ronde voltooi en halfpad in die tweede ronde was ek heel verbaas toe ek hom teen ’n heuwel verbygaan. My bene en lyf het gehou en ek het elke ronde daarin geslaag om die gaping te vergroot om vir die tweede jaar die elite titel te wen.“Ek bedank Rock & Rut-bergfietsklub wat die kompetisie gereël het, Nedbank wat die hoofborg is, Mannies Bike Mecca, Pupkewitz Megatech, my afrigter Hans du Toit vir sy harde werk en al die ondersteuners wat my aangespoor het.”Michelle Vorster het Sondag haar vyfde nasionale elite vrouetitel losgejaag om as Namibië se onbetwiste koningin van die berge gekroon te word.Vorster sê: “Dit is opnuut ’n eer en voorreg om as die nasionale kampioen bekroon te word en ek dra die trui met groot trots. Veral ná verlede jaar se ongeluk het ek besef hoe vinnig so ’n voorreg jou ontneem kan word. Baie dankie aan Rock & Rut, asook Nedbank wat ’n ongelooflike byeenkoms gereël het. Die kompetisie was fantasties beplan en die baan uitdagend. My opregte dank aan die Janine & Suzelle Davin-sporttrust wat verlede week hul borgskap al die pad tot by die 2021 Olimpiese Spele bevestig het.”Hahn, wat reeds met ’n wavrag fietsryprestasies spog, het die kampioenskap getakel sonder dat hy gedink het dat hy goed op peil was.“Ek het Sondag oopkop en sonder enige verwagtinge op die fiets geklim, want ek is nie naastenby op die vlak waar ek graag wil wees nie. Maar ek was sielkundig goed voorberei en ek dink dit het die verskil gemaak. Ek het ’n goor wegspring gehad, maar gou daarin geslaag om die pas aan te jaag en ’n gaping tussen my en Bergran Jensen, my strafste kompetisie, oor die vier rondes te bewerkstellig. Ek was versigtig en het tot die einde gewag voor ek my kaarte op die tafel geplaas het om my o.18-titel suksesvol te verdedig,” sê Hahn wat ook die 2020 Namibiese o.18-padfiets- en individuele tydtoetskampioen is.Du Plessis, wat vanjaar die eerste keer in die o.18-afdeling deelgeneem het, sê sy is verlig dat daar weer fietsrykompetisies is.“Die resies was baie hard, maar dit was ook baie lekker. Ek is verlig dat ons weer aktief kan deelneem. Ek is dankbaar, want ek kon vroeër die jaar die o.18-padfiets- en nou die bergfietstitel inpalm. Ek het met die grendelstatus binnenshuis met Zwift geoefen, dus kon ek nie spesiaal vir die bergfietskampioenskap oefen nie,” het Du Plessis gesê.Grossmann is die nasionale o.23-kampioen.“In geheel was Sondag vir my ’n fantastiese dag op die fiets. Ek het twee weke gelede besluit om aan die kampioenskap deel te neem en Mannie Heymans het sy persoonlike fiets vir my geleen om mee te ry.“Hoewel ek ’n spesialis bergafjaer is, het die resies seepglad en sonder voorval voltooi. Ek is baie beïndruk en verbaas met my tyd wat my tweede by die elite vroue sou geplaas het. Veral die tegniese gedeeltes het my kans gegee om verlore tyd in te haal. Ek sou dit nie sonder Mannie se hulp kon doen nie en is hom ewig dankbaar,” het Grossmann vertel.Die verkorte uitslae (elke ronde is 5.4 kilometer):Elite mans (6 rondes): 1 Alex Miller 1:32:13, 2 Tristan de Lange 1:35:14. Elite vroue (5 rondes): 1 Michelle Vorster 1:32:55, 2 Irene Steyn, 3 Marion Schonecke. o.23-vroue (5 rondes): Steffanie Grossmann 1:42:42. Junior mans (4 rondes): 1 Hugo Hahn 1:03:13, 2 Bergran Jensen 1:05:28, 3 JG van der Westhuizen. Junior vroue (3 rondes): 1 Monique du Plessis 1:04:53. - tielman@republikein.com.na

Topvyf verdien nasionale truie

Kommentaar

Republikein 2025-12-18

Meld asseblief aan om kommentaar te lewer

Topvyf verdien nasionale truie

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.