Tonge klap oor kondoomkontrak

Denver Kisting – Die uitvoerende direkteur van gesondheid en maatskaplike dienste, mnr. Ben Nangombe, sê dit is jammer dié ministerie loop gedurig onder onregverdige kritiek deur. Dít kom nadat die gesondheidsministerie opnuut in die spervuur is omdat hy onlangs ’n tender vir die lewering van kondome vir mans aan die staat aan ’n nuwe maatskappy toegeken het. Verlede week het die nuus rugbaar geword die enigste plaaslike kondoomvervaardiger, Commodity Exchange, is ná amper twee dekades hul kontrak met die staat kwyt.Nangombe het Vrydag by navraag oor die kondoomherrie gesê: “Dis jammer dat ons met modder gegooi word om ons onregverdig te diskrediteer.” Volgens hom het die langtermynleweraar van die voorbehoeding nie aan alle tegniese vereistes van die tender voldoen nie. “Hulle het nie voldoen aan die kriteria nie. Gevolglik kon hul bod nie voortgaan na die volgende stadium van evaluering nie,” het hy gesê. Nangombe vermeld nie dié vereistes in sy antwoord aan Republikein nie. Boonop, sê die uitvoerende direkteur, dié maatskappy se prys was meer as N$24 miljoen teenoor die gunstiger N$14 miljoen wat die suksesvolle tenderaar die staat sal aanslaan. “Nou sê vir my: Aan wie sou jy die tender toeken as jy in my skoene was? Aan ’n vervaardiger wat vir 17 jaar die amper-monopolie geniet het en die minister te veel wil aanslaan of ’n alternatief waar die ministerie die helfte van die geld kan spaar?” In die sosiale media gons dit oor die toekenning van die kondoomkontrak aan Supremo Medical Supplies. Mnr. Averouz Maritz sê in ’n aanlyn plasing op Facebook: “So, die Namibiese ministerie van gesondheid het besluit om aan Supremo Medical Supplies die kondoomtender toe te ken hoewel Namibië ’n kondoomvervaardiger het wat die afgelope 17 jaar kondome aan die staat gelewer het. Ons moet eenvoudig vra wie besit vir Supremo en van waar voer hulle ‘hul’ kondome in?” Volgens Maritz sal ’n land “deurspek met korrupsie nie ophou tot daar niks oor is nie. Ek bid Comex sluit sy fabriek en verskuif dit Suid-Afrika toe waar hulle heelwaarskynlik waardeer sal word.” Maritz se broer mnr. Bertranne Maritz, wat aan spits staan van Commodity Exchange, sê nie net is hulle die enigste vervaardigers van kondome nie, maar behartig hulle ook self toetse om gehalte van hul kondome te bepaal.Volgens hom is dit onseker hoe daar seker gemaak word die suksesvolle tenderaar se kondome voldoen aan die nodige vereistes.Hy sê voorts die jongste wending sal daartoe lei dat hulle hul werknemers sal moet aflê.Nangombe het hom Vrydag self tot Facebook gewend en in ’n plasing gesê Commodity Exchange is terdeë daarvan bewus hoekom hulle die kondoomtender kwyt is.Buitendien is die nuwe leweraar ook Namibies, het hy bygevoeg. Pogings om by Supremo Medical Supplies kommentaar te kry, was onsuksesvol.- denver@republikein.com.na

Tonge klap oor kondoomkontrak

Kommentaar

Republikein 2026-05-05

Meld asseblief aan om kommentaar te lewer

Tonge klap oor kondoomkontrak

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.