Tokio besnoei begroting vir Olimpiese Spele in 2020

Elvira Wood - Om die Olimpiese Spele aan te bied is nou eenmaal nie speletjies of goedkoop nie, veral nie vir die stadsvaders wat die begroting vir ’n Spele moet bestuur nie. Die organiseerders van die Somerspele wat in 2020 in Tokio aangebied word sê die begroting is met US$300 miljoen tot US$12,6 miljard verminder. Reuters berig hulle beplan om die begroting selfs verder te besnoei om die druk op Japanse belastingbetalers te verlig. Die organiseerders is kort nadat hulle die bod gewen het, gewaarsku die finale koste kan vier keer meer wees as waarvoor hulle oorspronklik begroot het. Navorsers aan die Oxford-universiteit het in 2016 ’n studie voltooi wat wys elke Olimpiese Spele sedert 1960, hetsy of dit in die somer of winter was, het hul begroting oorskry. Dit is ook volgens hulle die enigste mega-geleentheid wat altyd sy begroting oorskry. Luidens dié studie oorskry die koste van ’n Spele wat in die somer gehou word die begroting met gemiddeld 176%. Die Spele wat in 1976 in Montreal, Kanada, gehou is, hou die rekord van 720% oor sy begroting. Die Spele in 2008 in Beijing was die naaste in die kol. Hy het sy begroting met net 2% oorskry. Die gemiddelde koste om ’n Spele in die somer aan te bied, is volgens die navorsers US$5,2 miljard. Hulle het koste vir al die Speles wat tussen 1960 en 2016 gehou is vir dié berekening gebruik.Somer- vs. Winterspele’n Somerspele is aansienlik duurder as een wat in die winter aangebied word omdat dit uit meer sportsoorte bestaan.Die Spele wat in die winter van 2014 in Sotsji, Rusland, aangebied is, is die uitsondering op dié reël. Dit was die duurste spele ooit en het US$21,9 miljard gekos om aan te bied. Die Internasionale Olimpiese Komitee moedig lande aan om binne hul begroting te bly sodat ander lande nie afgeskrik word om dit in die toekoms aan te bied nie. “Ons wil ’n wonderlike Spele aanbied, maar ons wil nie onnodig staatsgeld gebruik nie,” sê Hidemasa Nakamura, finansiële hoof van Tokio 2020. “Ons sal aanhou om te probeer om koste te verminder.” Die stadsraad van Tokio is verantwoordelik vir US$5,6 miljard van die huidige begroting en die staat sal US$1,4 miljard bydra. Volgens die eerste weergawe van die begroting wat in Desember 2016 beskikbaar gestel is, sou dit Japan US$14 miljard kos om die Spele aan te bied. Die tweede weergawe staan nou op US$12,6 miljard. ’n Derde hersiene weergawe sal na verwagting teen Desember 2018 beskikbaar wees. Daar kan later selfs ’n vierde weergawe wees, berig Reuters.Tokio het ook in 1964 die Spele aangebied. Dit het hom toe, in 2015-dollarterme, ’n skrale US$282 miljoen gekos om aan te bied. - Netwerk24/Reuters

Tokio besnoei begroting vir Olimpiese Spele in 2020

Kommentaar

Republikein 2025-09-19

Meld asseblief aan om kommentaar te lewer

Tokio besnoei begroting vir Olimpiese Spele in 2020

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie