Tokio 2021: Miller se droom bewaarheid

Andrew PoolmanOp 19-jarige leeftyd het Alexander Miller se droom waar geword met die nuus dat hy gekeur is om Namibië volgende jaar by die Olimpiese Spele in Tokio te verteenwoordig.Die plaasseun van Helmeringhausen in die verre suide het die belofte gestand gedoen waarmee hy as 15-jarige in die tweede helfte van 2016 in plaaslike wedrenne teen die elite jaers op die toneel gebars het. Sedertdien het hy met nasionale titels, die junior Afrika-kroon en brons by die 2019 Afrika-kampioenskap in Windhoek sy opgang tree vir tree volgehou en gewys dat sy klimvermoë, temperament en taktiese uitgeslapenheid vir min uitdagings terugstaan.Miller het verlede maand die nasionale bergfietskampioenskap gewen, maar was die afgelope maande in ’n hewige stryd met Tristan de Lange (kampioen in die 2019 Afrika-spele) betrokke in keuringswedrenne om die Namibiese verteenwoordiger te bepaal.Miller was Saterdag opnuut aan die wenkant teen De Lange in die Sky Ride by Heja Lodge (deel van die Hollard Gravel & Dirt-reeks) en kort daarna het die Namibiese Fietsryfederasie (NCF) die aankondiging op sy Instagram-blad gedoen – Miller en Michelle Vorster is aangewys as die twee bergfietsryers wat Namibië by die Olimpiese Spele in Tokio in Julie 2021 sal verteenwoordig.Die NCF en die Namibiese Nasionale Olimpiese Komitee (NNOK) wag nog op fietsry se wêreldbeheerliggaam, die UCI, se finale bekendmaking van hoeveel plekke vir mans- en vroueryers aan elke land toegeken word. Dit word egter as ’n blote formaliteit beskou dat Namibië vier ryers sal mag stuur – Vera Adrian en Dan Craven in padfietsry, asook die bergfietsryers Vorster en Miller.Miller het Sondag in ’n onderhoud met die nuusagentskap Nampa gesê dit is reeds lank sy droom om die land se Olimpiese span te haal.“Vandat ek begin fietsry het, is die Olimpiese droom so vaagweg in die agterkop. Om dus te hoor dat ek amptelik gekies is, voel steeds byna onwerklik.“Daar is soveel om te sê oor al die ondersteuning wat ek van die mense agter my gekry het. My familie het my altyd ondersteun en aangemoedig en my afrigter doen soveel moeite en het van die begin af geloof in my gehad.”Hy het Mannie Heymans, driemalige Olimpiese bergfietsryer en eienaar van Mannie’s Bike Mecca, uitgesonder vir krediet vir sy moeite agter die skerms om seker te maak dat Miller voortdurend die beste fietstoerusting tot sy beskikking het.“Mannie het my ondersteun basies van die eerste oomblik dat ek begin fietsry het. Pupkewitz Megatech het ook baie geloof in my gewys en het baie nodige ondersteuning verskaf.“Dan is daar natuurlik al my vriende en geesdriftige fietsry-aanhangers wat ryers aanspoor om altyd beter te doen.”Hans du Toit, die nasionale fietsry-afrigter van die afgelope jare, sê dit was en bly altyd ’n moeilike saak om een atleet te kies en ’n ander weg te laat.“Die tweestryd tussen Alex en Tristan was net so gelyk en dit het ons fietsryliefhebbers se harte in twee geskeur. Ek weet hoeveel potensiaal lê in albei. Ons klein landjie gaan ’n atleet in beide die mans- en vroueresies hê. Dit is ’n voorreg, met net 22 of 23 lande wat gekwalifiseer het om aan te tree. “As Alex se afrigter, weet hy ná die strawwe stryd om te kwalifiseer hoe belangrik dit is om alles te fokus op daai byeenkoms en die voorreg wat hiermee saamgaan. Die volgende 12 maande sal hieraan toegewy word. Hierdie is die kans van ’n leeftyd, om op daai wegspringlyn by die Olympiese Spele te staan. “Ek dink Alex besef dit, selfs as ’n 19-jarige, en sal alles in die stryd werp om Namibië met trots te verteenwoordig.”• Die marathonhardloper Helalia Johannes, bokser Junius Jonas en roeier Maike Diekmann is die ander individue wat sover in die Namibiese span vir die 2021 Olimpiese Spele gekwalifiseer het.

Tokio 2021: Miller se droom bewaarheid

Kommentaar

Republikein 2026-07-17

Meld asseblief aan om kommentaar te lewer

Tokio 2021: Miller se droom bewaarheid

Kommentaar

Republikein 2026-07-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.