Toestel 'lig die donker wolke in jou gemoed'

Is jy in ’n goeie bui? Kort jy ’n bietjie woema voordat jy die dag aandurf?Jy kan natuurlik allerlei medisyne probeer om sulke probleme vinnig op te los. Maar sê nou daar was ’n veilige, maklike en wetenskaplik verantwoordbare alternatief wat jy boonop elke dag kan gebruik?Die eerste digitale masjientjies wat presies dít belowe, is nou kommersieel beskikbaar.Een hiervan is die Thync, wat vroeër vanjaar op die Consumer Electronics Show in Las Vegas, Nevada, as een van die topprodukte in die kategorie vir koel tegnologie aangewys is.Die Thync is ’n draagbare en koordlose elektrode wat jy agter jou oor inhaak sodat dit soos ’n misplaaste oogklap aan die kant van jou voorkop sit. Jy kan dan gekalmeer word of meer opgewek voel deur die ooreenkomstige verstellings op die Thync te kies. Wel, dít is die aanspraak wat gemaak word.Na gelang van jou keuse stuur die Thync ’n reeks elektriese impulse wat, volgens die vervaardigers, sekere dele van jou brein stimuleer om die gewenste reaksie te hê. Dit is baie soos wat ’n massering of ’n koppie koffie sou doen, sê mense wat dit al probeer het.Ten spyte van groot skeptisisme vooraf, en heelwat geheimsinnigheid aan die kant van die ontwikkelaars, word die Thync nou aan die publiek te koop aangebied. Die Amerikaanse Food and Drug Administration het die Thync onlangs vrygestel van die regulasies wat normaalweg op mediese toestelle van toepassing is.Nou, die oomblik as iemand oor iets soos breingolwe begin aangaan, is dit beslis raadsaam om die lug te beruik vir die onmiskenbare geur van bollie. Dink maar aan al die skarminkels wat masjiene geprakseer het wat kamstig jou pyne wegvat of ontvoerde meisies in Portugal kan opspoor.Doen dié ding dus wat hy aanspraak maak om te doen?Ja, sê ’n paar heel geloofwaardige proefkonyne. Will Shanklin van Gizmag het byvoorbeeld albei modusse probeer, en sê dit was “soos dwelmmiddels” – sonder al die slegte goed.Die kalmerende effek was “soos om ’n zol te rook”, maar sonder dat jy ook met ’n knaaglus, bloedbelope oë of geheueverlies opgeskeep sit. (Moet my asseblief nie vra van watter soort zol hy praat nie.)En hy beskryf die Thync se opwekkingseffek asof “’n sluier van deurmekaarheid oor hom gelig het”.Amerikaners kan die Thync nou reeds vir US$299 (sowat R3 750) by thync.com bestel. Dit sal vanaf Oktober ook in ander markte beskikbaar wees. – Netwerk24/Willem Kempen

Toestel 'lig die donker wolke in jou gemoed'

Kommentaar

Republikein 2026-09-18

Meld asseblief aan om kommentaar te lewer

Toestel 'lig die donker wolke in jou gemoed'

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.