Toeriste aangeval

Francoise Steynberg Wat veronderstel was om ’n vakansie en reis van herinneringe deur hul geboorteland te wees, het vir oud-Namibiërs in ’n nagmerrie ontaard toe hulle Woensdag in die hoofstad aangeval en beroof is.Die 68-jarige dr. Hans-Werner Graser van George was gister nog met veelvuldige beserings in die Lady Pohamba private hospitaal nadat hy eergister by Aloe Travel Lodge in Wikastraat in Olympia deur twee onbekende rowers aangeval is.In die toergeselskap was Graser en sy vrou, sy broer mnr. Wilfred Graser, en sy swaer, mnr. Zirk van den Berg van Kaapstad. Almal is oud-Namibiërs wat by mnr. Günter Nöchel van Windhoek kom kuier het. Hulle sou in die Erongostreek gaan toer by onder meer die Brandberg en Spitzkoppe.Hulle het omstreeks 16:30 eergister by die lodge arriveer en almal is gou eers badkamers toe.“Toe dr. Graser uitkom, sien hy iemand aan sy voertuig vroetel. Die rower het geskrik, goed gegryp en in ’n voertuig langsaan gespring waarin nog ’n vreemde man was,” vertel Nöchel.“Dr. Graser het probeer om die sleutels uit die wegkomkar se aansitter te trek, maar het misluk. Die kar met die twee rowers in het na die uitgang gejaag waar die hek nog oopgestaan het,” het Nöchel gesê.Intussen het Graser se vrou, Elsa, aan die wegkomkar se agterbuffer gehang.“Die rower het my swaer op die hande geslaan en uit die kar geskop. Hy het met ’n harde slag op die plaveisel geval.”Nöchel vertel hy en sy vrou het ’n paar minute later daar aangekom en sy bebloede, halfbewustelose swaer op die bed gevind en dadelik met hom hospitaal toe gejaag.Graser se beserings sluit in “’n gebreekte ribbebeen wat in sy long in steek, ’n geknakte ribbebeen, ’n erge kopbesering wat met steke toegewerk moes word asook erge kneusing aan sy regterskouer, vel en vingers”.Volgens Nöchel is sy swaer nie meer te gesond nie en hy moes in die intensiewesorgeenheid vir observasie opgeneem word. Graser sal moontlik eers ná twee dae ontslaan word. Belangrike dokumente soos hul paspoorte en lisensies is gesteel, asook hul kredietkaarte, ’n duur Nikon-kamera, flitslig en hul voertuig se spaarsleutel. Hul voertuig se slotte moet ook nou verander word. ’n Saak van diefstal en aanranding is by die polisie aanhangig gemaak, volgens Nöchel. Die familie weet nie of hulle hul beplande toer moet uitstel of afstel nie. Alles hang nou van Graser se gesondheid af.Hulle is teleurgestel in die veiligheidsmaatreëls by die lodge, maar die eienaar, mnr. Johan Lombaard, sê hy is net so geskok dat iemand helder oordag daar inry en gaste aanval. “Dit is die eerste keer in ses jaar vandat ek die lodge het dat só iets hier gebeur,” het Lombaard gesê.“Ek is besig om die sekuriteit op te skerp, soos om die sekureitsfirma te vervang, meer sekuriteitspersoneel aan te stel sodat daar permanente oë op die kamers ook is en die veiligheidsheining gaan geëlektrifiseer word.”Lombaard sê hy was tegemoetkomend teenoor die slagoffers en het vir hulle gesê om vir hom ’n lys van hul gesteelde goedere te gee wat hy by die versekering kan eis.

Toeriste aangeval

Kommentaar

Republikein 2025-11-05

Meld asseblief aan om kommentaar te lewer

Toeriste aangeval

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.