Toerisme: Verblyfsyfers tuimel

Francoise Steynberg Die Covid-19-pandemie gepaardgaande met geslote grense, die inperkingstyd en kwarantynmaatreëls het akkommodasiebesettingsyfers laat tuimel. Tog, volgens die uitvoerende hoof van die Gasvryheidsvereniging van Namibië (HAN), me. Gitta Paetzold, is daar hernude hoop ná pres. Hage Geingob se aankondig Woensdag oor verslapte toerismeregulasies. Volgens die mees onlangse statistiek van HAN het die besettingsyfers vir die derde kwartaal (Julie, Augustus en September) tot onder 8% gedaal in vergelyking met 64% in dieselfde tydperk van 2019. “Daar was ’n effense verhoging van besettingsyfers vanaf die tweede kwartaal (April tot Junie) tydens die maande van die reisverbod en inperkingstyd van slegs 4,5% tot 7,97% in die derde kwartaal. Die meerderheid was steeds kwarantynakkommodasie, maar tog ook vakansiereise,” het Paetzold verduidelik. Sy sê dit volg nadat Namibië middel September die Internasionale Lughawe Hosea Kutako (HKIA) vir toeriste en in Oktober sommige landsgrense heropen het.Paetzold sê die aankondiging van pres. Geingob Woensdag oor verslapte regulasies is ’n groot verligting en vreugde vir die toerismesektor. “Ná sewende maande wat soos ’n erge droogte vir die toerismesektor weens die internasionale reisverbod, streeksinperkingstyd en regulasies gevoel het, gee die aankondiging ware hoop vir herlewing,” sê Paetzold. “As na die toerismestatistiek van die afgelope nege maande gekyk word, asook die desperate toestand in die landelike gebiede waar vele gemeenskappe en bewaringsgebiede se inkomste grootliks van toerisme afhanklik is, kon die toerismeherlewingsinisiatief en president se aankondiging nie op ’n beter tyd gekom het nie.”‘REGULASIES REGVERDIG’Paetzold meen die nuwe regulasies is regverdig en aanvaarbaar en sy hoop dat dit meer internasionale en oorgrensreise na Namibië sal aanmoedig. “Terwyl die plaaslike mark se steun waardeer word, sal die toerismebedryf slegs oorleef as die vloei van internasionale reis, insluitend oorgrensreis vanaf Suid-Afrika en die Kavango-Zambezi-oorgrensgebied (Kaza), aansienlik verhoog,” verduidelik sy. Paetzold sê met die nuwe protokol kan die toerismebedryf veilige, gerieflike en suksesvolle reise vir plaaslike, streek- en internasionale besoekers aanbied. “Die paar internasionale toeriste wat sedert middel September kom kuier het, het Namibië se diensverskaffers se doeltreffendheid en professionaliteit geloof.”HAN bedank al die toerismeverenigings en die Namibië Toerismeraad (NTB), die staatshoof en leiers wat sedert Maart baie hard agter die skerms gewerk het vir die veilige heropening van toerisme. “Danksy die oopdeurbeleid, intense besprekings, onderhandelinge en die bereidheid en toewyding van die owerhede om na die wekroep van die toerismebedryf te luister, kon Namibië as ’n verenigde span ’n ooreenkoms bereik om die balans tussen gesondheid en die lewensbestaan van Namibiërs te vind,” sê Paetzold. “Namibië is gereed om gasheer vir die wêreld in ’n veilige, higiëniese en gemaklike omgewing te speel.” – francoise@republikein.com.na

Toerisme: Verblyfsyfers tuimel

Kommentaar

Republikein 2025-05-01

Meld asseblief aan om kommentaar te lewer

Toerisme: Verblyfsyfers tuimel

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie