Toerisme sonder grense met Kaza
'n Afvaardiging van diplomatieke lui het 'n sesdaagse toer deur vier lande van die Kavango-Zambezi-oorgrensbewaringsgebied onderneem.
Francoise Steynberg
Die Kavango-Zambezi-oorgrensbewaringsgebied (Kaza), 'n bewaringsinisiatief van Namibië, Angola, Botswana, Zambië en Zimbabwe, is die grootste oorgrensbewaringsgebied in die wêreld en spog met die grootste olifantbevolking in Afrika.
Die minister van die omgewing en toerisme, mnr. Pohamba Shifeta, in samewerking met die hoë kommissarisse van Botswana, me. Claurinha Tshnelo, en Zambië, me. Stella Libongani, die ambassadeur van Zimbabwe, me. Rofina Chikava, en die Verenigde Nasies se Ontwikkelingsprogram (UNDP) se verteenwoordiger in Namibië, me. Kiki Ghebo, het Maandag 'n Kaza-bemarkingsvideo in Windhoek bekend gestel.
Dít spruit uit 'n sesdaagse toer na vier Kaza-lidlande - Namibië, Botswana, Zambië en Zimbabwe.
Die toer is onderneem deur 'n afvaardiging van sewe ambassadeurs in Namibië, saakgelastigdes van Angola en Libië, die voormalige adjunkminister van internasionale betrekkinge en samewerking, me. Maureen Hinda, Ghebo en die besturende direkteur van Namibia Wildlife Resorts (NWR), me. Zelna Hengari.
Die doel van die toer was om vennootskappe vir toerisme as 'n oorgrens-inisiatief in Kaza te bevorder.
Hulle het die Popa-valle in Namibië besoek, asook die Chobe Nasionale Park in Botswana en die Victoria-watervalle in beide Zambië en Zimbabwe.
"Die betrokkenheid van ons diplomate by die Kaza-toer dui nie net op die goeie betrekkinge tussen hul regerings en Namibië nie, maar bevorder ook ekonomiese diplomasie deur bewaring en toerisme," het Shifeta gesê.
Hy sê hy was verheug om verlede week die ambassadeur van die Europese Unie, me. Jana Hybaskova, in die Mangetti Nasionale Park in die Kavango-Wesstreek raak te loop waar sy en haar 80-jarige ma gekamp het.
Kaza is 520 000 vierkante kilometer groot en bestaan uit sowat 40 nasionale parke, natuurreservate, woudreservate, bewaringsgebiede, wildbestuurgebiede en toerismekonsessies. Dit spog met toeristeattraksies soos die Victoria-watervalle, een van die sewe natuurwonders van die wêreld, en 'n wêrelderfenisgebied, asook die Okavango-delta, die grootste Ramsar-gebied in die wêreld.
Kaza spog met minstens 3 000 plantspesies en 600 voëlspesies in die opvangsgebiede van die Zambezi- en Kavangorivier.
In Namibië is die Nasionale Parke van Bwabwata, Mudumu, Nkasa Rupara, Khaudum en Mangetti deel van Kaza, asook die Zambezi-staatswoud en die bewaringsgebiede van Nyae Nyae en Na‡aJaqna.
Die bemarkingsvideo sal op vlugte van lugrederye soos Air Namibia, Air Botswana, Air Zimbabwe, TAAG Angola, Zambia Airways en South African Airways gewys word en ook onder verskillende toerismerade, ambassades in Namibië en in ander lande, en die Kaza-sekretariaat versprei word.
Die behoefte is ook uitgespreek dat visumregulasies tussen die Kaza-lande minder beperk moet word. Shifeta het gesê in Mei sal dié uitdaging tydens 'n vergadering met verskeie ministeries bespreek word.
Hengari het bevestig sedert die Kaza-roete oop is en deur NWR bemark word, het Sweedse, Duitse en Nederlandse burgers die gebied al besoek. “In Mei gaan 'n groep van 80 Suid-Afrikaners van die Tswane-motorfietsklub Kaza besoek,” het Hengari gesê.
Die Kavango-Zambezi-oorgrensbewaringsgebied (Kaza), 'n bewaringsinisiatief van Namibië, Angola, Botswana, Zambië en Zimbabwe, is die grootste oorgrensbewaringsgebied in die wêreld en spog met die grootste olifantbevolking in Afrika.
Die minister van die omgewing en toerisme, mnr. Pohamba Shifeta, in samewerking met die hoë kommissarisse van Botswana, me. Claurinha Tshnelo, en Zambië, me. Stella Libongani, die ambassadeur van Zimbabwe, me. Rofina Chikava, en die Verenigde Nasies se Ontwikkelingsprogram (UNDP) se verteenwoordiger in Namibië, me. Kiki Ghebo, het Maandag 'n Kaza-bemarkingsvideo in Windhoek bekend gestel.
Dít spruit uit 'n sesdaagse toer na vier Kaza-lidlande - Namibië, Botswana, Zambië en Zimbabwe.
Die toer is onderneem deur 'n afvaardiging van sewe ambassadeurs in Namibië, saakgelastigdes van Angola en Libië, die voormalige adjunkminister van internasionale betrekkinge en samewerking, me. Maureen Hinda, Ghebo en die besturende direkteur van Namibia Wildlife Resorts (NWR), me. Zelna Hengari.
Die doel van die toer was om vennootskappe vir toerisme as 'n oorgrens-inisiatief in Kaza te bevorder.
Hulle het die Popa-valle in Namibië besoek, asook die Chobe Nasionale Park in Botswana en die Victoria-watervalle in beide Zambië en Zimbabwe.
"Die betrokkenheid van ons diplomate by die Kaza-toer dui nie net op die goeie betrekkinge tussen hul regerings en Namibië nie, maar bevorder ook ekonomiese diplomasie deur bewaring en toerisme," het Shifeta gesê.
Hy sê hy was verheug om verlede week die ambassadeur van die Europese Unie, me. Jana Hybaskova, in die Mangetti Nasionale Park in die Kavango-Wesstreek raak te loop waar sy en haar 80-jarige ma gekamp het.
Kaza is 520 000 vierkante kilometer groot en bestaan uit sowat 40 nasionale parke, natuurreservate, woudreservate, bewaringsgebiede, wildbestuurgebiede en toerismekonsessies. Dit spog met toeristeattraksies soos die Victoria-watervalle, een van die sewe natuurwonders van die wêreld, en 'n wêrelderfenisgebied, asook die Okavango-delta, die grootste Ramsar-gebied in die wêreld.
Kaza spog met minstens 3 000 plantspesies en 600 voëlspesies in die opvangsgebiede van die Zambezi- en Kavangorivier.
In Namibië is die Nasionale Parke van Bwabwata, Mudumu, Nkasa Rupara, Khaudum en Mangetti deel van Kaza, asook die Zambezi-staatswoud en die bewaringsgebiede van Nyae Nyae en Na‡aJaqna.
Die bemarkingsvideo sal op vlugte van lugrederye soos Air Namibia, Air Botswana, Air Zimbabwe, TAAG Angola, Zambia Airways en South African Airways gewys word en ook onder verskillende toerismerade, ambassades in Namibië en in ander lande, en die Kaza-sekretariaat versprei word.
Die behoefte is ook uitgespreek dat visumregulasies tussen die Kaza-lande minder beperk moet word. Shifeta het gesê in Mei sal dié uitdaging tydens 'n vergadering met verskeie ministeries bespreek word.
Hengari het bevestig sedert die Kaza-roete oop is en deur NWR bemark word, het Sweedse, Duitse en Nederlandse burgers die gebied al besoek. “In Mei gaan 'n groep van 80 Suid-Afrikaners van die Tswane-motorfietsklub Kaza besoek,” het Hengari gesê.
Kommentaar
Republikein
Geen kommentaar is op hierdie artikel gelaat nie