Toerisme in ergste krisis in twee jaar

Henriette LamprechtNamibië en suidelike Afrika se toerismebedryf staar die ergste krisis die afgelope twee jaar in die gesig wat ‘n geweldige impak nie net op werksgeleenthede inhou nie, maar ook op bewaring. Die verlies aan gekanselleerde besprekings tot ver in 2022 in Namibië asook Botswana, Zambië en Zimbabwe, het reeds tot verliese van miljoene Namibiese dollar gely.Met min of geen finansiële ondersteuning en geen belastingverligting of verpligte fooie van plaaslike regerings, gaan die toerismebedryf die derde jaar binne waarin die algehele koste van oorlewing op die bedryf en sy personeel val. Die Suider-Afrikaanse toerisme- en safaribedryf bevind hom in ’n ernstige krisis met verrykende “onheilspellende” gevolge, sê die Africa’s Eden-toerismevereniging waarvan bogenoemde vier lande lede is. Volgens die vereniging se uitvoerende hoof, me. Jillian Blackbeard, het ’n opname getoon tussen 70% tot 95% se besprekings vir Desember en Januarie is verlore, terwyl sowat 3 500 mense reeds hul werk in die bedryf tydens die feesseisoen verloor het. “Die verlies aan werksgeleenthede en inkomste is geweldig,” sê Blackbeard.In ’n opname tydens die week van 6 Desember het 56 respondente gesê hulle moes 3 478 werknemers laat gaan. ’n Gemiddeld van US$135 000 in besprekings het in die eerste week van die jongste reisbeperkings verlore gegaan. Met verwysing na vlugte, sê Blackbeard verskeie vlugroetes is afgestel of verminder, terwyl die verskaffingsketting van sleutelmarkte swaar daaronder ly. “Spesialis-toeroperateurs en agente in sleutelmarkte bestaan nie meer nie of werk met beduidend minder personeel.”Operateurs se besteding op aankope is volgens die opname sowat US$156 miljoen minder sedert die aanvang van die pandemie, met verskeie projekte wat op ys geplaas moes word wat ‘n verlies van US$33 miljoen beloop en veral klein- en mediumondernemings raak. Baie lede kla ook oor ‘n verlies aan vaardighede met hoëvlak-personeel wat noodgedwonge hul heil in ‘n ander bedryf moes soek. ‘n Voorbeeld is ‘n lid wat al vyf sy voedsel- en drankbestuurders vir beter werksgeleenthede in Dubai verloor het. Blackbeard het na die geweldige impak van Covid op bewaring verwys en gesê “safari-toerisme is die hart van die bewaringstorie in suidelike Afrika”. “Om betrokke in bewaring en gemeenskappe te wees, is ‘n noodsaaklikheid vir hierdie toerismemaatskappye. Buiten die nasionale parke voorsien die natuurgebaseerde toerismebedryf die stewels vir bewaring op die grond.”Volgens die opname het finansiële ondersteuning aan onder meer gemeenskapsprojekte tot US$6,7 miljoen gedaal omdat geen toeriste geen geld beteken. Blackbeard sê meer as die helfte van respondente het ‘n sigbare toename in stropery in en langs beskermde bewaringsgebiede gesien weens die verlies van inkomste tydens die pandemie. Besprekings vir 2022 het tot stilstand gekom en die vooruitskatting volgens haar is dat suidelike Afrika ‘n derde “baie moeilike oorlewingsjaar” gaan hê, sou beperkings nie dringend opgehef word nie. Blackbeard beskryf kwarantyn as die “kus van die dood” vir toerisme en stel voor dat kitstoetse, vergesel van ‘n negatiewe PCR-toets, by grensposte eerder gebruik word en toeriste só vry in die land kan rondbeweeg. Intussen het die Gasvryheidsvereniging van Namibië (HAN) by monde van sy uitvoerende hoof, me. Gitta Paetzold, die opheffing van die reisverbod ondersteun. Met tot 95% van besprekings tot ver in 2022 wat gekanselleer is, sê Paetzold, dis ‘n teken dat die internasionale reisbedryf vertroue in die streek verloor as ‘n veilige en toeganklike toeristebestemming en eerder gaan vir lande wat “oop en verbodvry” is vir toekomstige besprekings. Volgens haar het die huidige reisverbod Namibië se toerismebedryf in die “ernstigste krisis” die afgelope twee jaar gedompel. “Sou die verbod nie vinnig gelig word nie, is toerisme in Afrika se Eden, insluitend Namibië gedoem, sonder enige hoop op herstel en met verwoestende gevolge vir maatskappye se bestaan, werksgeleenthede, sowel as bewaring,” het sy gesê. – henriette@republikein.com.na

Toerisme in ergste krisis in twee jaar

Kommentaar

Republikein 2025-11-04

Meld asseblief aan om kommentaar te lewer

Toerisme in ergste krisis in twee jaar

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.