Toerisme bly stabiel

Francoise Steynberg – Die toerismebedryf se besettingsyfers vir akkommodasie het vanaf 2018 tot verlede jaar met een persent tot 53,5% gegroei."Alhoewel Namibië nie weer 2016 se besettingsyfer van byna 60% kon troef nie, word die huidige prestasie as positief beskou. Dit is gegewe die merkwaardige toename in die beskikbaarheid van nuwe geriewe op die mark, asook ongeregistreerde aanlyn akkommodasie," het me. Gitta Paetzold, die uitvoerende hoof van die Gasvryheidsvereniging van Namibië (HAN), gesê. Die afgelope dekade verwerk HAN statistieke vir besetting in die Namibiese toerismebedryf. Paetzold sê in die verlede het meeste toeriste Namibië net vanaf Julie tot Oktober besoek. "Verlede jaar was daar 'n toename van 6% in die besettingsyfer tydens die tweede kwartaal (April tot Junie) en 'n verhoging van 2% in die eerste kwartaal," sê sy. "Dit maak op vir die geringe afname in besetting in die tradisionele piekseisoen van Julie tot Oktober. Dit is dalk ’n aanduiding dat Namibië stelselmatig besig is om in ’n heeljaar-reisbestemming te ontwikkel."Volgens die verslag is ontspannings die hoofdoelwit van besoekers aan hotelle, lodges, gastehuise, kampe en ander akkommodasiegeriewe in die land. Die besettingsyfer in 2019 vir die ontspannings-toerismemark was 3% hoër, volgens HAN. "Dit is belangrik dat Namibië gefokus bly op ontspanningstoerisme as 'n sleutel tot groei," sê die direksievoorsitter van HAN, mnr. Shepherd Chinhoi. Toeriste uit Sentraal-Europa (Duitsland, Oostenryk en Switserland) verteenwoordig 30% van die besettingsyfers, terwyl 'n bykomende 12% uit die Benelux-lande soos Frankryk, Italië, Spanje en Portugal graag hier vakansie hou. Suid-Afrikaners verteenwoordig 8% van die besettingsyfer, terwyl Namibiërs nou meer deur hul eie land reis met 26% kamers wat deur Namibiërs verlede jaar bespreek is. "Die Namibiese toerismebedryf het die afgelope paar jare stabiel gebly en HAN en sy lede is bewus van die mededingende omgewing in die toerismebedryf. Die coronavirus en die impak op die internasionale toerismebedryf wys hoe vinnig die bedryf geraak kan word," sê Paetzold. "Dit is belangrik om op feite te fokus en nie op fopnuus en paniekerige reaksies nie, wat katastrofies vir die toerismebedryf kan wees." HAN se tema vir vanjaar is “Unlocking new horizons”. HAN se kongres in Junie fokus op die potensiaal van die ontwikkeling in die Tsau //Khaeb Nasional Park (voorheen Sperrgebied) in die suide van Namibië. - francoise@republikein.com.na

Toerisme bly stabiel

Kommentaar

Republikein 2025-06-17

Meld asseblief aan om kommentaar te lewer

Toerisme bly stabiel

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie