Toer na Skotland sneuwel ook

Tielman van Lill – Die Namibiese Eagles moes gedurende Julie in die Wêreldbeker Liga 2-kompetisie (CWCL2) van die Internasionale Krieketraad (ICC) hul man in 'n mini-toernooi in Skotland teen die gasheerspan en Nepal gestaan het.Dié internasionale eendagtoernooi is egter weens Covid-inperkings in Namibië en Skotland tot Julie aanstaande jaar uitgestel. Die Namibiese span kon in Junie nie rêrig oefen nie, vanweë die moratorium op kontaksport. Die ICC se oorweging om dié mini-toernooi in Spanje aan te bied, het ook deur die mat geval.Mnr. Johan Muller, uitvoerende hoof van Krieket Namibië, sê: “Dit sou ons eerste deelname in die CWCL2-reeks in 16 maande gewees het. Gelukkig verstaan die ICC ons omstandighede en hulle het die toernooi uitgestel.“Die uitstel sal nie 'n impak op ons status in die CWCL2 hê nie, want die nuwe datum val steeds binne die twee jaar wat die kompetisie gespeel word. Dit gee Namibië die geleentheid om intussen te verbeter en sterker te word.”Pierre de Bruyn, hoofafrigter, sê: “Die kansellering van die toer is nie net vir ons 'n teleurstelling nie, maar vir almal. Daar was baie harde werk agter die skerms gedoen om die kompetisie te laat gebeur.“Maar soos ons die laaste 16 maande gesien het, het Covid die laaste sê. Dit was opnuut die geval toe ons op die nippertjie ingelig is. Ons moes nog net ons visums bespreek het.“'n Paar van ons spelers is positief getoets en ook van die afrigtingspersoneel. Die veiligheid van ons spelers kom eerste en dit is waarna ons moes omsien.“Die toernooi word weer vir Julie 2022 in Skotland beplan en ons sien uit daarna. Die volgende drie, vier weke gaan weer frustrerend vir enige sportman wees waar ons met regulasies sit wat ons verhoed om krieket te speel.“Elke speler sal weer soos verlede jaar tydens isolasie beproef word, maar as dit verby is, sal ons die werk voortsit. Wanneer die krieketseisoen in Augustus begin, gaan daar baie krieket wees.“Ons is besig met Krieket Zimbabwe om hul A-span te stuur en dit lyk baie belowend dat ons hulle in Augustus vir eendag- en T20-wedstryde hier kan hê. Die Titans besoek ons aan die einde van dieselfde maand en dadelik daarna vertrek ons Bloemfontein toe om die Knights aan te durf.“Dit is opwindend om te sien wat voorlê. Al hierdie wedstryde is ter voorbereiding van ons strategie vir die T20-Wêreldbeker. Ek glo dit sal genoegsame wedstrydoefening vir die Eagles wees.“Ons hoop regtig daar val nie weer iets voor nie. Dit was erg frustrerend om alles af te handel en dan word al ons planne deur omstandighede omver gewerp.”Namibië se volgende geskeduleerde deelname in CWCL2 is in Augustus in Windhoek, wanneer die Eagles teen Oman en VAE opgeweeg word. Dieselfde drietal is ook veronderstel om mekaar in Desember in die Emirate te ontmoet.T20 WÊRELDBEKER VERSKUIFMet die Covid-19-pandemie wat in Indië steeds hoogty vier, is die 2021 T20-Wêreldbeker na die Verenigde Arabiese Emirate en Oman verskuif, het die ICC gister aangekondig.Wedstryde sal in Dubai, Abu Dhabi, Sharjah en in Oman gespeel word – vanaf 17 Oktober tot 14 November. Sestien spanne, insluitend Namibië, sal meeding.Die Namibiese kaptein, Gerhard Erasmus, is die enigste Namibiese kolwer op die ICC se T20-kolfranglys in die 68ste posisie (uit 100). Die linkerarmdraaibouler Bernard Scholtz pronk op 53ste onder die boulers. Die Eagles is tans 18de op die ICC se internasionale ranglys vir ODI-lande, terwyl hulle 19de op die internasionale T20-ranglys pronk.Die sewe lande in die CWCL2-reeks (2019-2023) , is tans soos volg geplaas:1 Oman (speel 10, wen 8, 16 punte)2 VSA (speel 12, wen 6, 12 punte)3 Skotland (speel 8, wen 4, 9 punte)4 Namibië (speel 7, wen 4, 8 punte)5 V.A. Emirate (speel 7, wen 3, 7 punte)6 Nepal (speel 4, wen 2, 4 punte)7 PNG (speel 8, wen 0, 0 punte)– tielman@republikein.com.na

Toer na Skotland sneuwel ook

Kommentaar

Republikein 2025-12-18

Meld asseblief aan om kommentaar te lewer

Toer na Skotland sneuwel ook

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.