Tjoekiekos Fishrot-6 se voorland

Denver KistingBehalwe as die sogenaamde Fishrot-6 hulle voor volgende Woensdag suksesvol tot die landdroshof in 'n borgtogaansoek wend, sal hulle nie Kersfees by hul geliefdes aan huis deurbring nie.Die hoërhof in Windhoek het gister uitspraak voorbehou in 'n dringende aansoek wat mnre. Bernhard Esau, Sacky Shanghala, James Hatuikulipi, Tamson Hatuikulipi, Ricardo Gustavo en Pius Mwatelulo gebring het.Waarnemende regter Kobus Miller het uitspraak voorbehou.Hy sal om 10:00 op 27 Desember uitspraak lewer, het Miller gesê.Die mans het gister by monde van hul swaargewigregspan voet by 'n stuk gehou hulle word onregmatig onder haglike omstandighede by die Seeis-polisiestasie aangehou en moet vrygelaat word.Adv. Tembeka Ngcukaitobi SC, die Economic Freedom Fighters (EFF) van Suid-Afrika se regsman, het aan Miller gesê kwessies wat met individue se vryheid verband hou, is inherent dringend.Hy tree vir Esau, James Hatuikulupi en Gustavo op.Ngcukaitobi het gesê die lasbriewe vir die mans se inhegtenisnemings is ongeldig. Daarom, sê hy, is hul voortgesette aanhouding onwettig.Hy het groot gewag gemaak daarvan dat inhegtenisneming 'n drastiese stap is. “Die lasbriewe was onnodig. Inhegtenisneming moet die laaste uitweg wees.”Die aanklaer wat om die lasbrief aansoek gedoen en die landdros wat die lasbrief gevolglik uitgereik het, het versuim om hul diskresie te gebruik, sê hy.“Hoekom is hulle in hegtenis geneem? Ons het hier te doen met senior beamptes van die staat. Hulle het geen motief om weg te hardloop nie.”Die mans se onderneming om met die owerhede saam te werk, behoort ook in ag geneem te gewees het, het Ngcukaitobi gesê. Buitendien het die aanklaer nie die landdros ingelig dat Esau en Gustavo vantevore onregmatig aangehou is nie.Dit het gekom nadat 'n eerste lasbrief vir hul inhegtenisneming kragtens 'n ooreenkoms tussen alle partye te vaag was deur net na “korrupsie” as die beweerde oortreding te verwys.Die landdros sou ook anders beslis het indien hy geweet het die ondersoek na die beweerde plundering van viskwotas is nog nie afgehandel nie.Boonop voer Ngcukaitobi aan is die saak teen die Fishrot-6 polities gemotiveer.Hy sê ook die Teenkorrupsiekommissie (ACC), wat bewerings van korrupsie, geldwassery en bedrog teen die mans ondersoek, het onder openbare druk geswig.In die stadium toe die jongste lasbrief bekom is, het die ACC se saak hoofsaaklik op 'n hokaairoeper se getuienis berus, het die senior advokaat gesê.Adv. William King SC het ook namens Shanghala, Tamson Hatuikulipi en Mwatelulo klem geplaas daarop dat alle tersaaklike agtergrondinligting aan die landdros wat die tweede lasbriewe uitgereik het, verskaf moes gewees het.King het eweneens benadruk dat inhegtenisnemings die laaste uitweg moes gewees het. “Die vryheid van 'n mens is baie belangrik. Vryheid is een van die boustene van die oppergesag van die reg.”Adv. Piet van Wyk SC het namens die respondente, wat die ACC, die aanklaer-generaal en die inspekteur-generaal insluit, gesê die partye het vroeër vandeesmaand in die landdroshof ooreengekom om nie aan te gaan met 'n aansoek om borgtog nie.Daar is ook ooreengekom om die saak tot 20 Februarie volgende jaar uit te stel, terwyl die mans in aanhouding sal bly.Gevolglik kan die mans weer die landdroshof nader met 'n formele aansoek om borgtog indien hulle vrygelaat wil word.Van Wyk het vir Miller gelyk gegee as die lasbriewe uit die staanspoor ongeldig was, behoort die mans vrygelaat te word sonder om hulle weer tot die landdroshof te wend.Volgens Van Wyk is die lasbriewe egter wel regmatig uitgereik.Hy sê daar was geen regsplig op die aanklaer om die omstandighede van die vorige lasbriewe met die landdros, wat die nuwes uitgereik het, te deel nie. AGTERGROND'n Storm het verlede maand om die mans se koppe losgebars toe dit onthul is hulle het na bewering etlike miljoene dollar se omkoopgeld ontvang by 'n Yslandse maatskappy in ruil vir Namibiese viskwotas.Tot in daardie stadium was Esau die minister van visserye en mariene hulpbronne, terwyl Shanghala die minister van justisie was. Hulle het sedertdien bedank.James en Tamson “Fitty”, Esau se skoonseun, is neefs.James Hatuikulipi was die uitvoerende hoof van Investec en Gustavo is 'n bestuurder by die beleggingsreus.Hatuikulipi het sedertdien bedank, terwyl Gustavo geskors is hangende 'n ondersoek.Die mans bly in aanhouding by die Seeis-polisiekantoor by die Internasionale Lughawe Hosea Kutako.– denver@republikein.com.na

Tjoekiekos Fishrot-6 se voorland

Kommentaar

Republikein 2026-02-05

Meld asseblief aan om kommentaar te lewer

Tjoekiekos Fishrot-6 se voorland

Kommentaar

Republikein 2026-02-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.