Tienerswangerskappe ‘n ‘tragedie’

Jemima Beukes – Die Khomasstreek het 89 tienerswangerskappe in die eerste termyn van die jaar aangeteken, terwyl 1 002 leerlinge tussen 2015 en 2018 swanger geraak het. Die Namibiese ombudsman, adv. John Walters, het dit as ‘n “tragedie” beskryf, terwyl die adjunkminister van geslag, me. Lucia Witbooi, sê daar is “geen verskoning” vir jong meisies om swanger te raak as seksonderrig geredelik beskikbaar is nie.Die direktoraat van onderwys in die Khomasstreek het syfers aan Republikein se susterkoerant Namibian Sun vrygestel ná ‘n navraag oor verwante statistieke uit die Oshanastreek waar 88 leerlinge, ingesluit twee graad 7-leerlinge, in die eerste termyn swanger geraak het. Volgens die direktoraat in Khomas het 80 hoërskoolleerlinge, vyf laerskoolleerlinge en vier leerlinge aan hulpbron- of spesiale skole in die streek in die eerste termyn swanger geraak. In 2018 is 268 tienerswangerskappe aangeteken, teenoor 180 skoolmeisies in 2017. In 2016 was dit 266 en in 2015 288 leerlinge. Volgens die direkteur van onderwys in die streek, mnr. Gerard Vries, is daar ‘n raamwerk wat onderwysers en volwasse ondersteuningspersoneel by skole verplig om swanger leerlinge te ondersteun. “Die meisies word nie noodwendig uitgesonder nie; die seuns word ook vir berading gestuur. Die ideaal is dat leerlinge in die skool bly of na die skool terugkeer. Ons doen alles in ons vermoë om te verseker dít is moontlik,” het hy gesê. Volgens Vries betrek die minderheid gevalle volwasse mans en word dit as verkragting aangemeld. Volgens die Verenigde Nasies se Bevolkingsfonds (UNFPA) se statistieke het die Kunene-, Omaheke- en Kavangostreek ‘n tienerswangerskapkoers van meer as 30% in vergelyking met die nasionale koers van 19%.Die kinderregte-aktivis me. Rosa Namises sê dié koers is ‘n noodkreet. Sy het bygevoeg kinders wat met gestremdhede leef en spesiale skole bywoon, het sorg en liefde die meeste nodig. “As spesiale skole ingesluit word en jy skenk oorweging aan die weerloosheid van die meisies, kom dit neer op verkragting. Baie belangrik is om te sien wie die mans is, want ek kan jou verseker die meeste is volwasse mans,” het sy gesê. “Ons het nou optrede nodig. Ons het nodig dat die minister van geslag en vroulike ouers intree en optree. Selfs mense soos Rosa Namises moet ook ophou kommentaar lewer. Ek het ‘n plan van aksie wat ons moet implementeer.”Walters het sy skok oor die swangerskappe in laerskole uitgespreek en Namises se mening gedeel dat dit “maklik is om te praat”. “Wat doen ons as ouers en rolspelers om ons jong meisies en seuns te leer om nie seks op skool te hê nie? Dit wil voorkom of daar geen voorkomende openbare onderrig vir leerlinge is nie,” het hy gesê.Volgens Walters moet ‘n oplossing gevind word en moet ouers begin om openlike en eerlike gesprekke met hul kinders te hê.“Ek dink nie ons doen veel om die kwessie te pak nie. Dit is ‘n tragedie dat ‘n jong meisie nie met haar onderrig kan voortgaan omdat sy skielik ‘n ma is nie.” Witbooi het gesê haar ministerie takel die kwessie wel, maar het ook erken daar word nie genoeg gedoen nie. Sy het bygevoeg sommige meisies is moontlik nie bewus van die gevolge van onbeskermde seks nie. jemima@namibiansun.com

Tienerswangerskappe ‘n ‘tragedie’

Kommentaar

Republikein 2025-11-05

Meld asseblief aan om kommentaar te lewer

Tienerswangerskappe ‘n ‘tragedie’

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.