Tien ooreenkomste vir beroepsopleiding Dinsdag onderteken

Die hoof uitvoerende beampte van die Namibië Opleidingsowerheid (NTA), mnr. Jerry Beukes, het Dinsdag tien ooreenkomste vir prioriteitsopleiding met verskeie Namibiese instansies onderteken.Die ooreenkomste is ingevolge die opleidingsheffing se sogenaamde finansieringvenster vir sleutel-opleidingtoekennings aangegaan. Die instansies wat nou voordeel uit die toekennings trek, is DAPP Beroepsopleidingsentrum wat onderrig in die bou- en mynbousektor aanbied. Vir opleiding van 20 mense in messel- en pleisterwerk ontvang die onderneming N$1 328 908. In die algemene sektor bied die instansie opleiding in kantooradministrasie aan 20 mense en ontvang N$980 625.Die Namibian College of Open Learning (Namcol) bied in die vervaardigingsektor ’n nasionale sertifikaat in motorwerktuigkunde aan vir nege studente. Hiervoor is ’n bedrag van N$1 180 863 bewillig.Altesaam 20 studente studeer vir ’n nasionale diploma in loodgieter en pyppassing, waarvoor Namcol N$1 059 437 ontvang.’n Verdere N$1 257 439 is bewillig om die studiekoste te finansier van 20 studente wat ’n nasionale sertifikaat in sweis- en metaalwerk wil behaal.Die Phillipi Trust Namibia sal N$2 469 660 ontvang vir die opleiding aan 60 studente wat in gesondheidsorg en maatskaplike dienste studeer en ’n sertifikaat in beradingsdienste wil behaal. Die Wolwedans Akademie het N$1 535 072 ontvang om 32 studente in gasvryheid en toerisme op te lei. Die Business School of Excellence sal 50 studente in groot- en kleinhandelverspreiding oplei en hiervoor het hulle N$1 475 250 ontvang. ’n Verdere 150 studente sal opleiding in groot- en kleinhandel operasies ontvang waarvoor N$4 425 750 bewillig is en 100 studente sal ’n nasionale sertifikaat in logistiek verwerf waarvoor die sakeskool N$2 610 500 ontvang.Die Triumphant College of Telecommunication sal 50 studente in elektriese- en elektroniese ingenieurswese oplei en hiervoor het die NTA N$1 205 976 toegeken. Dieselfde bedrag is bewillig om opleiding aan 50 studente in bou-ingenieurswese te gee terwyl studente in telekommunikasie-ingenieurswese ook ’n soortgelyke bedrag ontvang. N$899 520 is aan die kollege toegeken vir die opleiding van 40 studente in boekhouding. Voorts sal 30 studente teen ’n koste van N$674 640 in bemarking opgelei word.Tulipohamba Training Academy ontvang N$468 750 om 25 studente op te lei sodat hulle sertifikate in berading kan ontvang; N$1 837 500 om 75 studente in beroepsgesondheid en –veiligheid op te lei; N$1 100 000 om 50 gesondheidsadministrateurs op te lei en N$955 100 om studente in gemeenskapsgesondheid op te lei. Altesaam 901 mense sal opleiding ontvang.’n Verdere N$8 694 210 is vir kapasiteitbou aan drie opleidingsinstansies voorsien. Dit is soos volg toegeken: Die DAPP Vocational Centre sal bystand ten bedrae van N$3 417 655 ontvang vir produksie-eenhede en skeppende benaderings tot opleiding. Die Community Skills Development Foundation (Cosdef) ontvang N$3 347 179 vir toerusting, klein opknappings en herstelwerk aan drie Cosdef-opleidingsentrums, soos deur die Namibië Kwalifikasie-owerheid (NQA) aanbeveel. Dit sal die drie sentrums in staat stel om vlak twee akkreditasie te verwerf. Die Federasie vir Gesiggestremdes het N$1 929 376 ontvang vir voortgesette rehabilitasie van 45 gesiggestremde mense by die federasie se dienssentrum. Dit sluit bydraes vir Braille-skrif, opleiding in gemeenskapsgegronde rehabilitasie, rekenaaropleiding, die ontwikkeling van entrepreneurskap en bewusmakingsveldtogte in.Volgens Beukes moet tot 35 persent van alle geld wat met die beroepsonderwys en opleiding-heffings ingevorder word, in die ontwikkeling van vaardighede en kapasiteit in prioriteitsektore van die ekonomie belê word.Hy het die versekering gegee dat ’n openlike en deursigtige proses gevolg is en wys daarop dat opleidingsdiensverskaffers in Oktober 2015 genooi is om voorstelle vir opleiding voor te stel in sektore waarin daar ’n groot aanvraag is, soos geïdentifiseer in die NTA se plan vir die ontwikkeling van nasionale vaardighede.Voorstelle wat ontvang is, is op grond van streng tegniese kriteria ontleed ten einde seker te maak dat begunstigde studente uit hoë gehalte opleidingsdienste voordeel trek.“Van besondere belang vir die NTA in hierdie rondte ooreenkomste, is die ondersteuning wat aan die Namibiese Federasie vir Gesiggestremdes (NFVI) verleen word. Dit is in pas met ons voortgesette oogmerk om die insluiting van mense met gestremdhede in die beroepsonderwys en opleidingsektor in te sluit deur gespesialiseerde toerusting, opleidingsmateriaal ten einde te verseker dat toegang tot opleidingsinstansies nie beperk word nie.“Die Finse federasie vir gesiggestremdes het voorheen die NFVI geldelik ondersteun, maar daardie bystand het op 30 Desember 2015 ten einde geloop. Dit het in April vanjaar tot die beëindiging van rehabiliterende opleidingsprogramme gelei.” Beukes sê die groei wat met die heffing vir beroepsonderwys en opleiding bereik is, het meegebring dat betroubare nasionale finansiering nou beskikbaar is om plaaslike tegniese en beroepsopleiding van ’n beter gehalte aan ’n groter aantal mense aan te bied.

Tien ooreenkomste vir beroepsopleiding Dinsdag onderteken

Kommentaar

Republikein 2025-11-05

Meld asseblief aan om kommentaar te lewer

Tien ooreenkomste vir beroepsopleiding Dinsdag onderteken

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.