Tien jaar gelede…

Yandi du PlessisDis moeilik om te grootmens. Die stelling klink amper belaglik, maar ek dink die meerderheid sal met my saamstem. Ek en ’n lewenslange vriendin het nou die dag byna nostalgies geraak oor ons skooldae. Destyds het ons gedink “grootmense” wat sê: “Jy gaan eendag terugverlang na jou skooldae,” is belaglik. Moet my nie verkeerd verstaan nie, ek hunker geensins terug na die dae van take, toetse en huiswerk nie, maar as ek nou daaraan dink, was dit tien jaar gelede my 13-jarige self se grootste probleem. Wel, dít en die vis wat ons sommige dae by die koshuis vir middagete gekry het. Die laasgenoemde bewys egter my punt verder. Ons het eenuur die middag by die huis gekom, en daar was kos op die tafel. Dit was nie nodig om te stres oor die prys van vleis, kaas of botter nie. Die konsep van budgeting was wildvreemd. Ons weeklikse sakgeld is reguit na die snoepie toe. Chips, tjoklits en Coke was ons hoofuitgawes. Kan jy jou indink? Op my relatiewe jong ouderdom voel dit klaar soos ligjare gelede. Uitgawes soos toiletpapier, swartsakke en Sunlight-skottelgoedseep was nie eens ‘n halwe gedagte nie. Om nie eens te praat van huur, water, elektrisiteit en medies nie! Om siek te wees, was eintlik ’n bedekte seën. Jy kon by die huis bly, en jou ma of die koshuistannie het om jou gekloek en vir jou tee en roosterbrood aangedra. Ek sal erken, ek is ’n regte baba as ek siek is. Ek hou daarvan om opgepiep te word. Nou moet ek my eie doktersafsprake maak en in gedagte hou dat ek net ’n sekere aantal siekverlofdae kry. Ek kla nie, ek sê maar net! Ek sal jongmense aanraai om nie hul lewens verby te wens nie. Die grootmenslewe is overrated (ek kan nie aan ’n goeie Afrikaanse woord dink nie). Nou dat ek ouer en effens wyser is, kan ek uiteindelik met daardie onnosele volwassenes saamstem. Jy gaan terugverlang na daardie dae. Ek verstaan nog steeds nie presies hoe belasting werk nie, en ek vergeet dikwels om my plante nat te maak en die vullis uit te vat. Ek sal nie omgee om net een dag oor te hê nie – skooldrag, wiskunde-huiswerk (wat ek in elk geval sou afskryf), aknee, knopknieë en al.

Tien jaar gelede…

Kommentaar

Republikein 2026-06-29

Meld asseblief aan om kommentaar te lewer

Tien jaar gelede…

Kommentaar

Republikein 2026-06-29

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.