Tiangong-1 val waar dit g’n skade aanrig

Die Tiangong-1, ’n Chinese ruimtestasie waaroor dié land beheer verloor het, het Maandag omstreeks 08:15 Beijing-tyd die atmosfeer binnegedring en in die middel van die Stille Oseaan geval, berig CNN.

Volgens die Chinese Ruimteagentskap het die meeste van die dele reeds in die val uitgebrand.

Die nuusagentskap berig dat dit ’n vurige einde van een van China se grootste ruimteprojekte was.

Die land se plan was om ander modules daarby aan te las totdat hy sy eie groot stasie het, maar hy het reeds in 2016 beheer oor die klein ruimtestasie verloor toe dit al laer gesak het.

Die Tiangong-1, wat 10,5 m lank en 3,4 m in deursnee was, het 8 500 kg geweeg toe dit in September 2011 gelanseer is. Dit het die laaste paar weke die wêreld se aandag getrek toe dit begin val het.

Jonathan McDowell, ’n astrofisikus van die Harvard-Smithsonian Center for Astrophysics, sê dit het presies geëindig soos wat die afgelope 24 uur voorspel is.

“Dit het soos verwag iewers geval waar dit geen skade kon aanrig nie.”

*Die ruimtestasie MIR van Rusland het in 2001 onder beheerde omstandighede na die aarde geval, uitgebrand en die stukkies het in die see geval.

Die Amerikaanse Skylab het ’n gedeeltelik beheerde val in 1979 gehad met Nasa wat daarin kon slaag om dit deels te stuur. Stukke het in die Indiese Oseaan en in die weste van Australië geval. – Netwerk24/BBC/CNN