Tenderstormloop vir droogtevoer

Ronelle Rademeyer - Altesaam 127 verskaffers het aangedui hulle wil tender om van vandeesmaand tot Desember maandeliks 35 000 sakke veevoer en net soveel bale ruvoer aan die goewerneurs in die streke te lewer.Dit is in totaal 420 000 sakke en bale droogtevoer oor die volgende ses maande.Net ’n handjie vol van hierdie voornemende tenderaars is bekende verskaffers in die landboubedryf, blyk dit uit die lys van 127 voornemende tenderaars wat in die nuutste uitgawe van die Tender Bulletin verskyn.Die sluitingsdatum waarop verskaffers moes aandui of hulle belangstel om te tender (EOI), was 18 Junie.Volgens ’n ingeligte bron het tenderpreneurs die bekende veevoerhandelaars in die land oorval met navrae oor die beskikbare produkte en wat dit kos. Daar is selfs boumaatskappye, siviele ingenieursmaatskappye en supermarkte wat belangstel om te tender. Dit was die eerste van net twee openbare tenders wat geadverteer is as deel van die regering se beloofde sowat N$573 miljoen-noodleniging om verligting aan boere te verskaf tydens die ergste droogte in menseheugenis in die land.Dié hulp, wat deur die ministerie van landbou, water en bosbou geadministreer word, sluit die voorsiening van water met watertenkwaens, die rehabilitasie en installasie van boorgate, bemarkingsaansporingsmaatreëls vir veeboere, veevoer vir kernkuddes en gesubsidieerde vervoer van vee na noodweidingsgebiede in.Volgens die tenderkennisgewing vir die verskaffing van hierdie veevoer moet die voornemende tenderaar 100% Namibies wees, of een van die vennote in ’n gesamentlike onderneming (JV) moet 100% Namibies wees.Verder moet die veevoere wat hulle lewer, ingevolge artikel 36 van die wet op kunsmis, plaasvoere en landboumiddels geregistreer wees.Dit mag nie diereproteïen en groeihormone bevat nie en dit moet vir beeste, skape én bokke geskik wees.Die ander vereiste is dit moet in 50 kg-sakke gelewer word en die bale ruvoer moet 20 kg weeg.Mnr. Piet Gouws, voorsitter van die Lewendehaweprodusente-organisasie (LPO), sê die beskikbaarheid van kragvoer en ruvoer is reeds “’n enorme probleem” in die land.Feedmaster, Namibië se grootste veevoervervaardiger, het by navraag die versekering gegee sy eerste prioriteit is om voer te lewer aan bestaande kliënte wie se bestellings al tot in Oktober vooruit geskeduleer is. Mnr. Christo du Plessis, bemarkingsbestuurder, sê Feedmaster het self ook ’n EOI ingedien, maar sal dit nie uit sy huidige kapasiteit voorsien sou hy die tender kry nie.Mnr. Jaco Labuschagne, die hoofbestuurder, sê reëlings is getref met veevoervervaardigers in die winterreënvalstreek in Suid-Afrika om vir Feedmaster kontrakvervaardiging te doen. Dié kapasiteit beloop 1 500 ton per maand.

Tenderstormloop vir droogtevoer

Kommentaar

Republikein 2025-08-05

Meld asseblief aan om kommentaar te lewer

Tenderstormloop vir droogtevoer

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie