Telecom: Soeklig steeds op oudbestuurders

Ogone Tlhage - 'n Korrupsiesaak waarby voormalige hooggeplaaste Telecom-beamptes betrek word, sal volgens me. Nomvula Kambinda, die maatskappy se woordvoerder, in die hoërhof aangehoor word.Telecom het in November verlede jaar me. Jinah Buys, sy regsdienstehoof, mnr. Robert Offner, hoof- finansiële beampte en mnr. Ben van der Merwe, hoof interne ouditeur, geskors. Dié skorsings is later gevolg deur die skorsing van die maatskappy se voormalige besturende direkteur, mnr. Theo Klein. Hierdie omstandighede spruit uit die beweerde twyfelagtige betaling van sowat N$12 miljoen van Telecom aan Canocopy.'n Kontrak tussen Telecom Namibia en Canocopy is in 2013 onderteken.Canocopy sou hiervolgens vir 36 maande lank drukkers aan Telecom Namibia verskaf. Offner, Van der Merwe en Buys is in verband met dié kontrak geskors. Volgens hofstukke wat in die hoërhof geliasseer is, het Telecom Namibia sowat N$4,8 miljoen tussen Maart 2016 tot Junie 2017 aan Canocopy betaal. Dokumente wys die kontrak is op 9 Maart 2016 vir 'n verdere 16 maande hernu, voordat Telecom Namibia verlede jaar besef het dit is bedrieglik. Dié besluit is gebaseer op 'n Telecom-resolusie van 2016 wat 'n vervalste handtekening van 'n voormalige besturende direkteur, mnr. Frans Ndoroma, gehad het wat in 2014 afgetree het.Volgens Kambinda is die saak hangend. Sy wou nie spesifiseer watter strafregtelike stappe teen die viertal ingestel is nie en of Telecom Namibia net die geld wat oorbetaal is, wil terughê nie. Kambinda het gesê Buys se interne verhoor by Telecom gaan voort en is nog nie afgehandel nie.Die ander drie bestuurders is nie meer in diens van Telecom Namibia nie en het bedank en afgetree. Offner het bedank, terwyl Klein en Van der Merwe afgetree het.Telecom Namibia sê in hofstukke Offner was nie by magte om die kontrak met Canocopy te onderteken nie, omdat dit die maatskappy se perk van N$5 miljoen oorskry het. Die kontrak moes volgens vereistes geadverteer word en sou ook die besturende direkteur se handtekening moes toon.Telecom beweer hy het Canocopy vir die duur van die twyfelagtige kontrak N$70 000 te veel per maand betaal. Volgens dokumente is N$1,1 miljoen te veel deur Telecom oorbetaal.

Telecom: Soeklig steeds op oudbestuurders

Kommentaar

Republikein 2025-05-13

Meld asseblief aan om kommentaar te lewer

Telecom: Soeklig steeds op oudbestuurders

Kommentaar

Republikein 2025-05-13

Meld asseblief aan om kommentaar te lewer

MELD AAN

Advertensie