Telecom in kuberaanval
Dié staatsonderneming sê kuberkrakers kan op enige iemand toeslaan.
Augetto Graig – Telecom Namibia was laas week die teiken en slagoffer van 'n kuberaanval wat verskeie dienste lamgelê het.
Volgens Telecom se woordvoerder, me. Nomvula Kambinda, is 'n poging deur kuberkrakers teen Telecom se interne korporatiewe netwerkkommunikasiestelsel opgemerk. “As voorsorgmaatreël het Telecom besluit om van sy interne korporatiewe IT-stelsels af te skakel, om die maatskappy toe te laat om regstellend op te tree en enige skade te beperk,” sê sy.
Kambinda dring daarop aan dat Telecom nie die enigste teiken van kubermisdadigers is nie.
“Namate die wêreld meer verbind raak en netwerke aanhou ontwikkel, vermeerder kuberaanvalle wêreldwyd en raak hul pogings om konvensionele verdediging te omseil, ook meer ingewikkeld as ooit tevore. Namibië is nie immuun teen sulke pogings nie,” sê sy.
Oor die laaste 12 maande moes Telecom 'n verskeidenheid skadelike sagteware opspoor en beperk.
“Dit wissel van rekenaarvirusse, wurms, 'trojans', reklameware en losprysware,” sê sy. Sy het nie uitgebrei oor die spesifieke aard van die nuutste aanval nie.
Sy sê Telecom, met sy vennote, stel gevorderde veiligheidsoplossings en maatreëls in om bestaande sekuriteitstelsels te versterk en te verbeter, “om gevorderde kuberbedreigings af te weer”, sê sy.
“Ons netwerk en dienste aan ons kliënte is nie geraak nie, behalwe vir sekere van ons interne prosesse,” sê sy. Telecom-kliënte het egter wel tussen 18 en 20 September gesukkel om die staatsonderneming se kliëntediens te kontak, en Maandag moes e-poskorrespondensie nog deur werknemers se persoonlike adresse, eerder as dié gehuisves by telecom.na, gekontak word.
Volgens Kambinda is alle maatreëls ingestel om te verseker dienste aan kliënte gaan voort en besighede word minimaal geraak.
“Pogings tot normalisering van die interne korporatiewe IT-omgewing is in 'n gevorderde stadium en sal binnekort voltooi word,” het sy gister gesê.
Sy sê Telecom bied kuberveiligheidsoplossings aan kliënte deur middel van hul iway Smart Hosting-produk.
“Telecom Namibia het die iway e-posplatform opgegradeer en gemoderniseer om verbeterde en funksionele dienste aan te bied, en ons is besig met kliëntemigrasie,” voeg sy by.
Hoewel toerusting wat Telecom aan kliënte bied om by hul persele op te stel ingeboude sekuriteitskenmerke en -funksies bevat, moedig sy Namibiërs steeds aan om te verseker hul netwerke en toestelle bly veilig.
– [email protected]
Volgens Telecom se woordvoerder, me. Nomvula Kambinda, is 'n poging deur kuberkrakers teen Telecom se interne korporatiewe netwerkkommunikasiestelsel opgemerk. “As voorsorgmaatreël het Telecom besluit om van sy interne korporatiewe IT-stelsels af te skakel, om die maatskappy toe te laat om regstellend op te tree en enige skade te beperk,” sê sy.
Kambinda dring daarop aan dat Telecom nie die enigste teiken van kubermisdadigers is nie.
“Namate die wêreld meer verbind raak en netwerke aanhou ontwikkel, vermeerder kuberaanvalle wêreldwyd en raak hul pogings om konvensionele verdediging te omseil, ook meer ingewikkeld as ooit tevore. Namibië is nie immuun teen sulke pogings nie,” sê sy.
Oor die laaste 12 maande moes Telecom 'n verskeidenheid skadelike sagteware opspoor en beperk.
“Dit wissel van rekenaarvirusse, wurms, 'trojans', reklameware en losprysware,” sê sy. Sy het nie uitgebrei oor die spesifieke aard van die nuutste aanval nie.
Sy sê Telecom, met sy vennote, stel gevorderde veiligheidsoplossings en maatreëls in om bestaande sekuriteitstelsels te versterk en te verbeter, “om gevorderde kuberbedreigings af te weer”, sê sy.
“Ons netwerk en dienste aan ons kliënte is nie geraak nie, behalwe vir sekere van ons interne prosesse,” sê sy. Telecom-kliënte het egter wel tussen 18 en 20 September gesukkel om die staatsonderneming se kliëntediens te kontak, en Maandag moes e-poskorrespondensie nog deur werknemers se persoonlike adresse, eerder as dié gehuisves by telecom.na, gekontak word.
Volgens Kambinda is alle maatreëls ingestel om te verseker dienste aan kliënte gaan voort en besighede word minimaal geraak.
“Pogings tot normalisering van die interne korporatiewe IT-omgewing is in 'n gevorderde stadium en sal binnekort voltooi word,” het sy gister gesê.
Sy sê Telecom bied kuberveiligheidsoplossings aan kliënte deur middel van hul iway Smart Hosting-produk.
“Telecom Namibia het die iway e-posplatform opgegradeer en gemoderniseer om verbeterde en funksionele dienste aan te bied, en ons is besig met kliëntemigrasie,” voeg sy by.
Hoewel toerusting wat Telecom aan kliënte bied om by hul persele op te stel ingeboude sekuriteitskenmerke en -funksies bevat, moedig sy Namibiërs steeds aan om te verseker hul netwerke en toestelle bly veilig.
– [email protected]
Kommentaar
Republikein
Geen kommentaar is op hierdie artikel gelaat nie