Teenstand teen beheerde toegang tot nedersettings

Augetto Graig – Die Windhoek-stadsraad se voorneme om nuwe inwoners se toegang tot informele nedersettings in die hoofstad te beheer, kry weerstand.Volgens 'n verslag wat die munisipaliteit verlede week by 'n raadsvergadering voorgelê het, is die hoofkwessie 'n tekort aan inligting en kennis tussen inwoners en nuwe inwoners oor die beleid wat vroeër vanjaar aangeneem is.Die munisipaliteit sê hulle kry verskeie en herhaaldelike aansoeke vir toestemming om nuwe wonings in Windhoek se nedersettings op te rig. Die goedgekeurde prosedure vereis huisgesinne wat aansoek wil doen, moet kan bewys hulle is werklik in nood, voordat toestemming verkry kan word. Eers dan, nadat toestemming verkry en die nuwe woning gebou is, kry die inwoners 'n sertifikaat van okkupasie. Inwoners wat reeds op die stad se grond- en behuisingswaglys is, mag ook toegang verkry, saam met werkers wat afgelê is.Min inwoners in die hoofstad se nedersettings ken die prosedures of die beleid, en inwoners met werklike nood gaan steeds voort om onwettige strukture op te rig, volgens die verslag. HINDERNISSE EN VOORSTELLEAnder struikelblokke sluit in die hoeveelheid tyd wat dit neem om 'n geskikte perseel uit te ken; persoonlike voorkeure wat aansoekers vir spesifieke grond het; die behoefte van huisgesinne om naby skole te bly wat hul kinders bywoon; toegang tot dienste soos water, riool en krag waar die munisipaliteit huise goedkeur; gevestigde gemeenskappe se verset teenoor nuwe families; en politieke invloede wat betrokke gemeenskappe teen nuwe inwoners kan opstook.Die munisipaliteit se voorstelle sluit in toegang tot dienste by goedgekeurde persele word verbeter, of nuwe inwoners word aangemoedig en ondersteun om hul eie toilette te bou. Munisipale beamptes behoort geskikte persele te identifiseer en satellietkantore vir die stadspolisie en munisipale behuisingskantore moet in nedersettings gevestig word. Verder stel die munisipaliteit voor dat 'n grootskaalse openbare inligtingsveldtog beplan en toegepas word, en om komitees vir gemeenskapsleierskap te stig.Gedurende die stadsraad se beraadslaging oor die kwessie het raadslid me. Queen Kamati die algemene weerstand van betrokke gemeenskappe teen die munisipaliteit se ingrype uitgelig, asook die probleme met die stigting van komitees vir gemeenskapsleiers. “Inwoners van Tobias Hainyeko wil nie deel van die komitees wees nie. Een komiteelid sê hy is laas aangerand toe hy na-ure mede-inwoners oor die nuutste verwikkelinge wou inlig. Hy sê hy is nie bereid om langer deel daarvan te wees nie,” het sy vertel.By ander geleenthede het gemeenskappe eenvoudig volstrek geweier om na raadslede se terugvoering te luister, het sy gesê. BELOFTES EN NAKOMINGRaadslid Ivan Skrywer stem saam en het gesê die vorige gemeenskapsvergaderings is laas in 2019 gehou. “Die belofte wat toe gemaak is, bly steeds,” sê hy.Volgens Kamati is daar 'n gebrek aan kennis oor munisipale ingrype, beleid en praktyk. “Inwoners weet nie. Mense is honger vir inligting, maar hulle voel ons doen niks vir hulle nie. Hulle sê hulle kry slegs inligting wanneer raadslede na hulle toe gaan, veral in Moses Garoeb, Samora Machel en Tobias Hainyeko. Tog voel hulle ook ons gaan net na hulle as ons iets soek, soos stemme, en al wat ons vir hulle vertel, is leuens, leuens, en nogmaals leuens,” sê sy. Daar is 'n groot verskil tussen wat die inwoners van Windhoek in die stad van munisipale sake weet, en mense in Katutura of die nedersettings, sê sy.Raadslid Sam Nujoma stem saam daar is 'n groot verskil tussen hoe die munisipaliteit dinge in ouer woonbuurte doen, en hoe dit in die nedersettings hanteer word. By 'n onlangse gemeenskapsvergadering in Windhoek-Wes is inligting vooraf gedeel, terwyl 'n vergadering in die nedersetting moes afskop met 'n uurlange voorlesing van betrokke raadsbesluite, omdat inwoners nie weet nie, sê hy. “Die manier waarop ons as 'n instansie dinge doen, frustreer die inwoners. Inwoners is gefrustreerd aangesien hulle nie sien wat die stad vir hulle doen nie,” het hy gesê.Die burgemeester van Windhoek, dr. Job Amupanda, het gesê openbare deelname is 'n probleem. Op 'n voorstel van die raadslid en gewese burgemeester, me. Fransina Kahungu, is besluit om die munisipale woordvoerders in te span om die nuwe veldtog te ontwerp en die bestuur daarvan te ondersteun.Die nuwe satellietkantore van die stadspolisie moet binne ses maande gevestig word, volgens die goedgekeurde munisipale aanbevelings. – augetto@republikein.com.naFOTODie Windhoekse stadsraadlid me. Queen Kamati sê inwoners moet beter van munisipale ingrype ingelig word. Foto Facebook (CoW)

Teenstand teen beheerde toegang tot nedersettings

Kommentaar

Republikein 2025-08-05

Meld asseblief aan om kommentaar te lewer

Teenstand teen beheerde toegang tot nedersettings

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie