Teaters van die dood

Henriette Lamprecht“Ongekende tekorte” aan basiese benodighede in die grootste en besigste drie staatshospitale in die land, het chirurge in diens van die ministerie van gesondheid en maatskaplike dienste laat besluit: Genoeg is nou genoeg.Dié tekorte wat die afgelope twee maande nuwe hoogtes bereik het, sluit steriele teaterjasse, handskoene, kateters, wonddekkings en verbande in. Benewens dié basiese tekorte in die teaters, sale en ongevalle-afdelings van die Windhoek Sentrale en Katutura-hospitaal, is ook die lugversorging swak. Volgens 'n geskrewe noodsein wat Dinsdag deur chirurge aan die minister gestuur is, styg die temperatuur in teaters drie en vier in die Katutura-hospitaal tot 30 grade.In die brief wat onder andere aan dr. Bernard Haufiku en die permanente sekretaris, dr. Andreas Mwoombola, gerig is, sê die ondertekenaars sommige noodmedisyne is ook nie beskikbaar nie. Dit verwys voorts na “swak teaterbeligting met geen handvatsels om dit te verstel nie”. Van neuro- en vaskulêre omleidings en dialise-kateters is daar ook geen teken van nie.Dieselfde tekorte word volgens die chirurge van die departement van chirurgie in Windhoek ook by die Oshakati Intermediêre Hospitaal ervaar. Volgens die beswaardes is die tekorte herhaaldelik deur onder andere die teatermatrones van die betrokke hospitale aan hoofde gerapporteer. Die chirurge plaas die blaam vir die tekorte op die nuutgeskepte sentrale stelsel vir aankope wat volgens hulle 'n “funksionerende stelsel vervang het”.“Ons is almal ten gunste van verandering, groei en ontwikkeling, maar dit moet egter in die regte konteks gedoen word,” sê die beswaardes.Die brief aan Haufiku maan die tekorte het tot 'n styging in siektes gelei, met prosedures vir sepsis en infeksies wat herhaal moet word. Ook kan teaterlyste nie afgehandel word nie, met die waglys vir operasies wat al hoe langer word.“Die stygende siektes en sterftes maak die chirurge moedeloos wat die risiko loop om hul professionele geloofwaardigheid in hul versorging van pasiënte te verloor,” lui die brief.Terselftertyd is die geloofwaardigheid van “ons ministerie wat ons ten spyte van dreigemente van regsaksie handhaaf en verdedig” ook in die gedrang. Die chirurge doen 'n dringende beroep op Haufiku om aandag aan die “noodsituasie” te gee en maan sy “direkteure mag hom anders oor die situasie inlig as wat hulle ervaar”.“Die verslegtende situasie raak pasiënte se lewe. Deur betyds in te gryp, sal die ministerie reusebedrae geld spaar deur beter resultate, vroeë ontslag, minder komplikasies en 'n korter waglys.”Hulle maan voorts onder die huidige toestande is dit “verstandig om alle gekose werk te staak, 'n noodvoorraadopname en aankoop van alle verbruiksgoedere te doen en slegs met chirurgiese prosedures voort te gaan”.Die beswaardes verwys voorts na die komende vakansieseisoen met die huidige situasie by die drie hospitale wat as 'n “kritieke noodgeval” beskou moet word.“Dit gaan versleg tot toestande wat lewens bedreig.”Die laaste beplande dag vir chirurgie sou 15 Desember wees, met operasies wat op 15 Januarie weer sou begin. Die chirurge sê in die lig van die huidige tekorte en toestande, sal teaters egter nou reeds Vrydag sluit wat genoeg tyd sal bied vir “korreksies om aangebring te word”.

Teaters van die dood

Kommentaar

Republikein 2025-05-13

Meld asseblief aan om kommentaar te lewer

Teaters van die dood

Kommentaar

Republikein 2025-05-13

Meld asseblief aan om kommentaar te lewer

MELD AAN

Advertensie