'Te min' navorsing oor derde dosis

Henriette LamprechtTe min navorsing en inligting is nog beskikbaar om te bepaal of 'n opvolgspuit nodig is nadat 'n persoon ten volle teen Covid-19 ingeënt is.Volgens die minister van gesondheid en maatskaplike dienste, dr. Kalumbi Shangula, is die “geskiedenis van entstowwe teen Covid-19 nog nie lank nie” en bestaan dit maar sedert die aanvang van die pandemie.“Ons weet dit verseker sterk immuniteit en dit neem twee tot drie weke voordat dit in werking tree. Met die tweede dosis verseker dit 'n hoër vlak van immuniteit, maar daar is nog nie genoegsame inligting oor 'n derde dosis nie,” het Shangula gesê.Hy het gesê die tydsverloop is ook nog nie genoeg om te bepaal hoe lank immuniteit ná inenting hou nie.“Daar is wel progressiewe monitering om te bepaal wanneer dit afneem, maar dit sal tyd neem om vas te stel. Niemand kan sê dit hou net 'n sekere tyd nie,” het die minister gesê. Buiten Sinopharm en AstraZeneca wat die enigste entstowwe tans in voorraad in Namibië is, word Johnson & Johnson en Pfizer glo deur die ministerie binne die volgende maand of wat in Namibië verwag. Die Wêreldgesondheidsorganisasie (WHO) het 'n moratorium op derde dosisse tot ten minste die einde van September geplaas.In Amerika het dié land se Voedsel en Medisyne-owerheid (FDA) die groen lig gegee vir 'n goedgekeurde derde dosis Pfizer-BioNTech en Moderna vir mense met verswakte immuunstelsels wat moontlik swakker beskerming van twee dosisse kry.Dit sonder mense uit wat orgaanoorplantings gehad het of dié met 'n soortgelyke vlak van 'n verswakte imuunstelsel. Die ekstra dosis is dieselfde as die aanvanklike eerste twee dosisse. 'n Raadgewende paneel van die Amerikaanse sentrums vir siektebeheer en voorkoming (CDC) het ook die derde dosis goedgekeur. Volgens die CDC word die meng van mRNA-entstowwe toegelaat vir die derde dosis indien die oorspronklike entstof nie beskikbaar is nie. Volgens die FDA se waarnemende kommissaris, me. Janet Woodcock, het ander wat ten volle ingeënt is, nie tans 'n bykomende dosis nodig nie. Die FDA se besluit is nie van toepassing op mense wat die enkeldosis Johnson & Johnson ontvang het nie, omdat daar nog nie genoegsame data is om bykomende dosisse te ondersteun nie. Wetenskaplikes is egter nog verdeeld oor die breë gebruik van derde dosisse onder dié sonder onderliggende toestande, omdat die voordele nog nie regtig bepaal is nie. Pfizer het vroeër gesê die doeltreffendheid van sy entstof verlaag mettertyd. Moderna het ook die uiteindelike behoefte vir derde dosisse erken, veral sedert die Delta-variant deurbraak-infeksies veroorsaak in mense wat ten volle ingeënt is. In Amerika geld die derde dosis Pfizer vir kinders so jonk as 12 wat aan die vereistes vir hoërisiko voldoen. Moderna geld net vir volwassenes. Volgens Kanadese navorsers het 55% van mense wat organe en 'n derde dosis ná standaard-inenting ontvang het, goeie vlakke teenliggaampies gehad in vergelyking met die 18% wat 'n plasebo ontvang het. Kenners het egter dié hoërisikopasiënte aangeraai om steeds voorsorg te tref aangesien daar nie 'n waarborg is dat 'n derde dosis sal werk nie. Met verwysing na die enkeldosis Johnson & Johnson-entstof is daar volgens die FDA min data beskikbaar oor hoe nog 'n dosis in hoërisikogroepe werk. Volgens die FDA se hoof van entstowwe, dr. Peter Marks, ondersteun bewyse tans net 'n voorstel van ekstra dosisse Pfizer en Moderna vir ontvangers met verswakte immuunstelsels. Die opvolgspuite (boosters) is volgens FDA vir mense wie se immuniteit oor 'n tydperk afneem en dié hoërisikogroepe het van die begin af nie genoeg beskerming gehad nie. Die opvolgspuit volg ten minste 28 dae ná die tweede dosis. Die Amerikaanse regering se topkenner vir aansteeklike siektes, dr. Anthony Fauci, het gesê vroeër of later gaan mense 'n opvolgspuit vir die duur van beskerming nodig hê, maar dit is egter nog nie tyd nie. In Israel is die geskikte ouderdom vir 'n derde dosis van Pfizer tot 50 jaar verlaag.Die land laat nou ook toe dat gesondheidswerkers 'n derde dosis entstof ontvang in 'n poging om die verspreiding van die meer aansteeklike Delta-variant te stop. Volgens Israel se gesondheidsministerie kan almal ouer as 50, gesondheidswerkers, mense met ernstige risikofaktore vir die virus, gevangenes en tronkbewaarders nou die opvolgspuit kry.– Bykomende bronne: Lancet/Medicalscience/Reuters– henriette@republikein.com.na

'Te min' navorsing oor derde dosis

Kommentaar

Republikein 2026-06-24

Meld asseblief aan om kommentaar te lewer

'Te min' navorsing oor derde dosis

Kommentaar

Republikein 2026-06-24

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.