Tata Madiba deur die oë van sy personeel

Hy was net ’n mens en het die kuns van menslikheid uitgestraal.So sê Sahm Venter en Vimla Naidoo, samestellers van I Remember Nelson Mandela,’n nuwe boek oor oudpres. Nelson Mandela, wat gisteraand in Kaapstad bekend gestel is.Die boek is geskryf deur vorige werkers van die oudpresident tydens sy termyn as staatshoof tot met sy afsterwe. Meer as 100 persoonlike staaltjies, stories, waarnemings en herinneringe is vervat.Veiligheidswagte, drywers, assistente, kokke, skoonmakers tot versorgers, wat elke dag in nabyheid met dié ikoon geleef het, vertel hoe hy altyd almal eerste as mens gesien het.“Hy was so besorg oor sy personeel dat hy self Kupido gespeel het onder hulle,” het Sahm Venter gesê.Die vertellings gee lesers ’n kykie in die lewe van Madiba soos nog nooit vantevore nie. Dit beeld hom uit as mens, vader en ‘stoute president’ wat graag veiligheidsprosedure oortree het om sy mense te groet.Sy kleindogter, Ndileka Mandela, het ook die geleentheid meegemaak en vertel hoe sterk, sjarmant en eenvoudig haar geliefde oupa was.“Sy teenwoordigheid het almal in die familie kalmeer. En sy humorsin was ongeëwenaar,” het sy gesê.Sy meen toekomstige generasies kan nou deur die boek haar oupa persoonlik en menslik ervaar.“Dis tog wie hy was. Die man wat altyd ’n kam in sy hempsak gedra het.”I Remember Nelson Mandela, is geskryf in ’n styl wat toeganklik en persoonlik is.“Ons wou niemand vervreem of uitsluit nie,” sê Venter.Die boek is ontwikkel uit ’n idee van oudpresident Mandela se vrou, Graça Machel. Sy het twee maande na die begrafnis ’n teepartytjie gereël om al Madiba se werkers te bedank vir hul onvoorwaardelike diens aan hom. Dis by die einste geleentheid waar werkers sy heengaan betreur het in stories, grappies en persoonlike herinneringe. Sy het ook die voorwoord van die boek geskryf.Werk aan die boek het sowat ’n jaar en half geneem. En tog is nie almal se stories daarin nie.“Nie almal kon met tydsbeperkings en woordtelling hul bydrae lewer nie. Ander wou hul herinneringe hou vir ’n later stadium,” sê Venter.Nie een van die werkers wie se bydrae in die boek opgeneem is, word betaal nie. Al die geld van verkope word aan die Nelson Mandela-stigting geskenk.Venter glo Madiba se erfenis is eintlik dat hy altyd mens was en dat dít ’n besonderse voorbeeld is vir almal. - Netwerk24

Tata Madiba deur die oë van sy personeel

Kommentaar

Republikein 2025-11-05

Meld asseblief aan om kommentaar te lewer

Tata Madiba deur die oë van sy personeel

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.