‘Talent dalk verlore sonder skolerugby in 2020’

Wim Pretorius - Skolerugby in 2020 het waarskynlik die uitklophou gekry met die Blou Bulle en die Goue Leeus se hoërskole-verenigings wat albei die seisoen gekanselleer het en met die oog op die toekoms kan dít verreikende gevolge vir belowende spelers inhou.

So meen talle skole se breiers en agente, wat kontrakte vir skoolseuns probeer kry by unies of klubs, wat nie meer vanjaar kans sal kry om Suid-Afrika se talentpoel in aksie te sien nie.

Len Olivier, die eienaar van Rugby Travel, glo die paadjie kan nou moeiliker wees, veral vir spelers wat nou in hul matriekjaar is en dalk nie verlede jaar al hul deurbraak gemaak het nie.

“Dit (die afstel van die rugbyseisoen) laat ’n helse leemte,” sê Olivier.

“Daar is ouens wat sonder twyfel nou deur die krake gaan val. Ons sien elke jaar dat seuns wat in graad 11 in skole soos Affies, Menlopark of Garsfontein se tweede of derde span gespeel en niemand van hulle geweet het nie, in matriek vir die eerste span uitstekende rugby opdis. Nou gaan daardie seuns dalk nie raakgesien word of kontrakte kry nie.

Rugby Travel het einde verlede jaar ’n groep seuns in Frankryk laat toer, waar hulle teen die junior spanne van onder andere Clermont, Castres en Bordeaux gespeel het.

Olivier sê hulle kan dalk aan die einde van die jaar weer só ’n toer beoog.

“Ek sal graag steeds aan die einde van die jaar kinders oorsee wil vat op ’n rugbytoer net sodat hulle iets uit die jaar kan kry en bietjie rugby speel,” sê hy. “Daar is nie vanjaar ’n Wildeklawer-toernooi of iets anders nie, so ek vermoed daar mag dalk ’n paar ouers wees wat die oorsese roete vir hul kinders wil kies.”

Hy sê die drastiese stap om reeds in Mei alle skolesport te skrap, is dalk oorhaastig geneem.

“Gesondheid is die eerste prioriteit en ’n mens wil niemand se lewens in gevaar stel nie. Ek weet egter nie of die getalle (Covid-19-infeksies) al regverdig dat sulke drastiese stappe nou al geneem moes word nie.

“Kinders gaan in elk geval binnekort terug skool toe, so hulle gaan beslis weer kontak met mekaar hê.”

Dit volg nadat Angie Motshekga, minister van basiese onderwys, verlede week gesê het die plan is dat matrieks en graad 7-leerlinge op 1 Junie teruggaan skool toe.

“Miskien kon wedstryde steeds sonder toeskouers plaasvind en deur iemand soos DigiTV gebeeldsend word vir almal om te kyk. Terselfdertyd is ek ook nie ’n dokter nie en die welstand van die kinders moet in ag geneem word.”

Die Hoërskole Menlopark (Beker), Ben Vorster van Tzaneen (Plaat) en Hugenote van Springs (Skild) sal intussen almal eers volgende jaar die kans gegun word om hul Virsekerbeker-titels te probeer verdedig.

Dean van der Watt, die eerste span se afrigter by Menlopark, sê sy hart gaan uit na sy leerlinge, wat met groot afwagting uitgesien het daarna om die skool se eerste titel in dié reeks te probeer verdedig.

“Dis uiters hartseer. Die kinders het hard gewerk en goed voorberei en nou is alles gekanselleer,” sê hy.

Tinus Diedericks, voorsitter van die Goue Leeus se Hoërskole Rugbyvereniging, het die afgelope naweek gesê daar is ’n skrale kans dat alles nog nie verlore vir skole in dié streek is nie.

“Sou die moontlikheid later die jaar kom en individuele skole wil speel, sal hulle aansoek moet doen by die uitvoerende raad en die Goue Leeus Rugbyunie, wat op hul beurt dit na Saru (Suid-Afrikaanse Rugbyunie) sal verwys.

“Daar sal streng maatreëls toegepas word indien enigiets toegelaat word,” het Diedericks luidens ’n verklaring gesê.

“Dit is beslis nie die 2020-seisoen waarna ons uitgesien het nie. Die grootste verloorders is miskien die spelers wat in hul finale jaar van hoërskole-skolerugby sou wees.”

Diedericks sê ook dat kinders nie moet dink alles is nou verlore nie.

“Onthou seuns, dit is nie die einde van jou rugbyloopbaan nie, dit is net ’n struikelblok,” het hy bygevoeg. – Netwerk24