Taksman hou jou bitcoin dop

Elvira Wood - Bitcoin mag dalk 'n kriptogeldeenheid wees, maar Jan Taks hou dit ­definitief dop.

Dr. Randall Carolissen, hoof van navorsing van die Suid-Afrikaanse Inkomstediens (SAID), sê mense wat bitcoin koop en verkoop, moet kapitaalwinsbelasting betaal op enige inkomste wat hulle daaruit verdien.

Carolissen het Dinsdag die SAID se nuutste statistieke oor belastingsyfers vir die 2016'-17-boekjaar by sy kantoor in Brooklyn, Pretoria, bekend gestel.

“Ons praat nog oor presies hoe ons kriptogeld soos bitcoin gaan hanteer. Op die oomblik beskou ons dit as 'n bate en dus moet kapitaalwinsbelasting op enige winste betaal word.”

Carolissen sê die SAID is in gesprek met verskeie tegnologieverskaffers en ander regerings oor hoe om kriptogeld in die toekoms te hanteer.

“Blokketting is nog 'n groot uitdaging,” sê hy.

Blokketting is die onderliggende tegnologie wat alle kriptogeld tans gebruik.

Bitcoin se waarde het die ­afgelope jaar van sowat US$1 000 vir 'n enkele bitcoin in Januarie tot meer as US$16 000 per munt in Desember gestyg. – Netwerk24/Bloomberg