Swemmers keer terug uit Tokio weens flater

Ses Poolse swemmers moes nog voor die begin van die Olimpiese Spele uit Japan terugkeer nadat die Poolse Swemfederasie (PZP) weens ’n administratiewe fout te veel deelnemers na die sportskouspel gestuur het.
Die swemmers, wat Sondag na Pole teruggereis het, dreig met regsaksie en doen ’n beroep op die grootbaas van die PZP om oor die voorval te bedank.
Die swemspan vir die Tokio-Spele het uit 23 mense bestaan.
“Ek wil graag my diepste berou, hartseer en bitterheid oor die situasie uitspreek,” sê Pawel Slominski, direkteur van die PZP, in ’n verklaring.
Slominski erken die flater, maar sê dit is veroorsaak deur ’n begeerte “om soveel moontlik atlete en afrigters te laat deelneem”.
Alicja Tchórz, een van die ses swemmers, kap die “onbekwaamheid” van die PZP en sê die beheerliggaam het die reëls verkeerd verstaan.
“Stel jouself voor jy offer vyf jaar van jou lewe op en . . . die uiteinde van jou opoffering is ’n totale flop,” sê sy op Facebook.
Tchórz het in 2012 en 2016 aan die Spele deelgeneem.
Nog ’n lid van die ses, Mateusz Chowaniec, sê op Instagram: “Hierdie situasie is absurd en moes nooit gebeur het nie.”
Pole se departement van kuns en kultuur dring daarop aan dat die PZP-president “dadelik verduidelikings gee” oor die voorval.
– Reuters


FOTO
Alicja Tchórz is een van die ses ongelukkige swemmers wat huiswaarts moes keer. Foto Getty Images