SWATF/Koevoet-optog gefnuik

Catherine Sasman - Die Namibiese polisie en lede van die spesiale taakmag het Maandag 'n groep van sowat 400 voormalige lede van die SWA-gebiedsmag en Koevoet in hul spore gestuit wat na Staatshuis wou opruk. Die voormalige soldate het die optog vir Maandag vroegoggend beplan sonder om die verwante owerhede daarvan in kennis te stel. Die groep het in gelid in Onafhanklikheidsrylaan begin afbeweeg en is deur die polisie by die Katutura-staatshospitaal voorgekeer. Die polisie het bevestig die optog is onwettig en die groep is vervolgens beveel om na die Rooi Vlag Kommando-saal in Katutura terug te keer. Die voormalige soldate neem reeds byna twee jaar, sedert 10 Januarie 2015, aan 'n sitstaking by die saal deel en dring aan op vergoeding en erkenning as militêre veterane. Hulle dring ook aan op pensioenuitbetalings van die N$36 miljoen wat deur die voormalige apartheids- en Suid-Afrikaanse regering ná Namibië se onafhanklikwording aan die plaaslike regering betaal is.Die voorsitter van die Namibiese Veteranetrust (Namvet), mnr. Jabulani Ndeunyema, sê komm. Willem Steenkamp het hom omstreeks 04:00 van die onwettige optog ingelig.'VERTROUE VERLOOR'Ndeunyema sê die voormalige soldate het vertroue in Namvet se leierskap begin verloor as gevolg van die regering se stilswye ten spyte van heelwat korrespondensie, vergaderings en beloftes wat op 'n konsultasiebasis voortduur. Hy sê voorts die minister van presidensiële aangeleenthede, mnr. Frans Kapofi, het Namvet op 17 Oktober ingelig dat president Hage Geingob visepresident Nickey Iyambo opdrag gegee het om met die voormalige soldate te vergader. Ndeunyema sê Iyambo het tot dusver nie met hulle kontak gemaak nie. Bejaarde voormalige soldate wat deel van die optog was, sê hulle is moeg vir die regering se stilswye.“Ons is kwaad, want ons ly,” sê mnr. Darius Utjavari (67), 'n voormalige lid van 102 Bataljon op Opuwo.“Ons het hard vir die Suid-Afrikaanse regering gewerk, Suid-Afrika het geld uitbetaal, maar ons het niks gekry nie.”“Van nou af wil ons presies weet wie hierdie land verwoes het,” sê die 60-jarige Ruben Kasera van Kavango. “Wie het landmyne geplant en bomme in banke geplant? Hierdie mense moet na vore kom. Was dit ons? Die mense wat die land verwoes het, is vandag die kinders van hierdie land. Ek, wat hierdie land beskerm het, is nie meer 'n kind van hierdie land nie. Hoekom nie? Van die Suide tot die Ooste, die Weste tot die Ooste, het ons hierdie land beskerm. Vandag word ons sleggepraat. “Wys ons waar ons landmyne en bomme geplant het. Baie onskuldige mense het seergekry.”

SWATF/Koevoet-optog gefnuik

Kommentaar

Republikein 2026-02-20

Meld asseblief aan om kommentaar te lewer

SWATF/Koevoet-optog gefnuik

Kommentaar

Republikein 2026-02-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.