Swapo gee ekstra tyd om topvier te nomineer

Politieke redaksie – Die politburo van die regerende party sal Donderdag opnuut vergader om bykomende nominasies vir die posisie van president, visepresident, sekretaris-generaal en adjunksekretaris-generaal toe te laat.Die sentrale komitee sal Sondag vergader om die nominasies te bekragtig.“Demokrasie in die party sal getoets word,” het president Hage Geingob Vrydag tydens Swapo se politburo-vergadering in Windhoek gesê. Partylede het volgens Geingob die geleentheid om demokrasie in Swapo te versterk.Een stok in die wiel voor November se kongres is dat streke en distrikte afgevaardigdes moet vervang wat nie aan die hand van grondwetlike voorskrifte verkies is nie.In ‘n nuusvrystelling het Swapo se sekretaris-generaal, mnr. Nangolo Mbumba, gesê die 50/50-voorskrif oor geslagsverteenwoordiging sal streng afgedwing word. Uit streke se tien afgevaardigdes en distrikte se vier afgevaardigdes moet die helfte, onderskeidelik vyf en twee, vroulik wees. Voorts moet hierdie afgevaardigdes lede van die streek of distrik se uitvoerende bestuur wees.Ministers en adjunkministers wat deur hierdie diskwalifiserings beïnvloed word, is mnre. Frans Kapofi, Obeth Kandjoze, Tom Alweendo en Calle Schlettwein, asook mee. Agnes Tjongarero, Maureen Hinda en Christine Hoebes.Die politburo het die besluit bekragtig dat Otjombinde se bestuur en koördineerder nie die kongres mag bywoon nie weens onreëlmatige verkiesings en dreigemente teenoor senior leiers.President Hage Geingob het sy gunstelinge vir die drie leiers wat saam met die partypresident die topvier sal vorm, Vrydag aangekondig. Hulle is me. Netumbo Nandi-Ndaitwah (visepresident), me. Sophia Shaningwa (sekretaris-generaal) en mnr. Marco Hausiku (adjunksekretaris-generaal).Volgens Geingob het hy uitvoerig met oudpresident Sam Nujoma en oudpresident Hifikepunye Pohamba oor sy keuses beraadslaag.Beide Geingob en Mbumba het opnuut teen onderduimse verkiesingsveldtogte gewaarsku.“Dit moet ‘n veldtog van kwessies wees en nie van persoonlikhede nie,” het Geingob in sy openingstoespraak gesê. Die belangrikste is volgens Geingob om oplossings vir die land se probleme te vind.Faksievorming is volgens Geingob natuurlik tydens hierdie mededinging, maar ná die tyd moet almal verenig agter die wenners staan. Vuilspel sal dit volgens Swapo se president bemoeilik.“Wanneer jy die bal speel, aanvaar spelers die uitslag wanneer die wedstryd verby is, skud hande en beweeg aan,” het Geingob gesê. “Wanneer jy die man speel, laat jy wonde en die wedstryd eindig in bitterheid, omdat wonde nie maklik genees nie.”Veldtogte moet volgens Mbumba “skoon en beskaafd” wees.Vrydag se vergadering in Windhoek is deur dr. Hoze Riruako geloof vir deursigtigheid en die inspraak wat aan alle lede gegee is.Me. Sophia Shaningwa is aangewys om die huidige vakature in die politburo te vul.

Swapo gee ekstra tyd om topvier te nomineer

Kommentaar

Republikein 2025-06-18

Meld asseblief aan om kommentaar te lewer

Swapo gee ekstra tyd om topvier te nomineer

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie